नंदुरबार l प्रतिनिधी-
पथराई ता. नंदुरबार येथील के. डी. गावित सैनिकी विद्यालय व कनिष्ठ विज्ञान महाविद्यालयात प्राचार्य शरद पाटील यांच्या अध्यक्षतेखाली इको क्लबची स्थापना करण्यात आली. पर्यावरण संवर्धन आणि शाश्वत जीवनशैलीचा संदेश विद्यार्थ्यांपर्यंत पोहोचविण्याच्या उद्देशाने या उपक्रमाचे आयोजन करण्यात आले.
इको क्लबच्या माध्यमातून ‘सेव्ह वॉटर’ या विषयावर विद्यार्थ्यांना पाण्याचे महत्त्व, पाणीटंचाईची गंभीरता तसेच प्रत्येकाने दैनंदिन जीवनात पाण्याची बचत करण्याची आवश्यकता याविषयी मार्गदर्शन करण्यात आले. विद्यार्थ्यांनी पाणी संवर्धनाचा संकल्प करत जलसंपत्तीचे जतन करण्याची प्रतिज्ञा केली.
यावेळी भारत सरकारच्या ‘मिशन लाइफ अभियानांतर्गत विद्यार्थ्यांना पर्यावरणपूरक जीवनशैलीचा अवलंब करण्याची शपथ देण्यात आली. या शपथेच्या माध्यमातून पर्यावरण संरक्षण, नैसर्गिक संसाधनांचा जबाबदारीने वापर आणि भावी पिढ्यांसाठी शाश्वत विकासाचा संदेश देण्यात आला.
या कार्यक्रमाचे आयोजन के. डी. पाटील व आर. एम. पाटील यांनी केले.कार्यक्रमास विद्यालयातील सर्व शिक्षक, शिक्षकेतर कर्मचारी तसेच विद्यार्थी उपस्थित होते.
