नंदुरबार l प्रतिनिधी-
नवीन शैक्षणिक वर्षाच्या स्वागतासाठी उत्साह, आनंद आणि प्रेरणेचे वातावरण निर्माण करणारा प्रवेश उत्सव का. वि. प्र. संस्था, भालेर संचलित द फ्युचर स्टेप इंग्लिश मीडियम स्कूल येथे मोठ्या उत्साहात व जल्लोषात संपन्न झाला. विद्यार्थ्यांच्या उज्ज्वल भवितव्याची नांदी ठरणारा हा सोहळा पालक, विद्यार्थी व मान्यवरांच्या उपस्थितीत अविस्मरणीय ठरला.
कार्यक्रमाच्या अध्यक्षस्थानी दिलीप पाटील हे होते. प्रमुख पाहुणे म्हणून प्रकाश शिरसाठ, माजी शिक्षक यांनी उपस्थितांना मार्गदर्शन केले. प्राचार्य पी. एस. सूर्यवंशी, पर्यवेक्षक पी. डी. पाटील, तसेच पालक प्रतिनिधी लोटन पाटील, वसंत पाटील, सुलोचना पाटील, लताबाई पाटील यांची प्रमुख उपस्थिती लाभली.
कार्यक्रमाच्या सुरुवात सरस्वती मातेचे पूजन करून सर्व नवीन विद्यार्थ्यांचे औक्षण करण्यात आले व त्यांना गुलाब पुष्प व शैक्षणिक साहित्य देऊन त्यांचे स्वागत करण्यात आले.
प्रवेश उत्सवानिमित्त नवागत विद्यार्थ्यांचे पुष्पगुच्छ, स्वागतगीत आणि टाळ्यांच्या गजरात स्वागत करण्यात आले. मान्यवरांनी विद्यार्थ्यांना शैक्षणिक जीवनात जिज्ञासा, शिस्त, परिश्रम आणि संस्कार यांचे महत्त्व पटवून देत नव्या शैक्षणिक वर्षासाठी शुभेच्छा दिल्या. विद्यार्थ्यांच्या चेहऱ्यावरील आनंद आणि पालकांच्या डोळ्यांतील समाधान यामुळे संपूर्ण परिसर मंगलमय झाला होता.
कार्यक्रमाचे सूत्रसंचालन व्ही. व्ही. ईशी यांनी केले.
या प्रवेश उत्सवाच्या यशस्वी आयोजनासाठी विद्यालयातील सर्व शिक्षक-शिक्षिका तसेच शिक्षकेतर कर्मचारीवृंद यांनी परिश्रमपूर्वक नियोजन करून कार्यक्रम यशस्वी केला.
दरम्यान, संस्थेचे संस्थापक अध्यक्ष भास्करराव हिरामण पाटील, कार्याध्यक्ष विजय बोरसे, उपाध्यक्ष चंद्रशेखर पाटील तसेच भालेरच्या मा.सरपंच कविता पाटील यांनी भ्रमणध्वनीद्वारे विद्यार्थ्यांना आणि शिक्षकांना नवीन शैक्षणिक वर्षासाठी हार्दिक शुभेच्छा दिल्या. त्यांच्या प्रेरणादायी संदेशांमुळे विद्यार्थ्यांमध्ये नवचैतन्य निर्माण झाले.
नवीन स्वप्नांना पंख देणारा, ज्ञानदीप अधिक तेजस्वी करणारा आणि विद्यार्थ्यांच्या सर्वांगीण विकासाचा संकल्प दृढ करणारा हा प्रवेश उत्सव विद्यालयाच्या शैक्षणिक वाटचालीतील एक संस्मरणीय पर्व ठरला. विद्यालयाच्या प्रगतीसाठी आणि विद्यार्थ्यांच्या उज्ज्वल भवितव्यासाठी सर्व स्तरांतून शुभेच्छांचा वर्षाव होत आहे.
