नंदुरबार | प्रतिनिधी
शहरातील स्टेट बँकेच्या मुख्य शाखेजवळ बुधवारी सायंकाळी एटीएममध्ये रोख रक्कम भरण्यासाठी आलेल्या कॅश व्हॅनच्या सुरक्षारक्षकाकडून चुकून गोळी सुटल्याची घटना घडली. गोळी फरशीवर आदळल्याने उडालेल्या तुकड्यांमुळे एका बँक कर्मचाऱ्याला किरकोळ दुखापत झाली. सुदैवाने या घटनेत कोणतीही जीवितहानी झाली नाही.
माहितीनुसार, स्टेट बँकेच्या मुख्य शाखेत रोख रक्कम पोहोचविण्यासाठी कॅश व्हॅन आली होती. रोकड उतरविण्याची प्रक्रिया सुरू असताना सुरक्षारक्षकाच्या बंदुकीतून अचानक एक राऊंड फायर झाला. गोळी थेट फरशीवर आदळल्याने मोठा आवाज झाला आणि फरशीचे तुकडे आसपास उडाले.
या घटनेत संजय दगाजी गायकवाड (वय ४३, रा. उमर्दे खुर्द, ता. नंदुरबार) हे जखमी झाले. फरशीचे तुकडे लागल्याने त्यांना तातडीने खासगी रुग्णालयात उपचारासाठी दाखल करण्यात आले. त्यांची प्रकृती स्थिर असल्याचे समजते.
घटनेची माहिती मिळताच पोलिसांनी घटनास्थळी धाव घेऊन पाहणी केली. प्राथमिक तपासात हा प्रकार बंदुकीतून चुकून गोळी सुटल्यामुळे घडल्याचे समोर आले असून नेमके कारण शोधण्यासाठी चौकशी सुरू आहे.
गजबजलेल्या बँक परिसरात घडलेल्या या घटनेमुळे काही काळ नागरिकांमध्ये घबराट पसरली होती. मात्र पोलिसांनी तातडीने परिस्थिती नियंत्रणात आणली. सुदैवाने मोठी दुर्घटना टळल्याने सर्वांनी सुटकेचा निःश्वास सोडला.
