नंदुरबार | प्रतिनिधी
शाहादा तालुक्यात लाचलुचपत प्रतिबंधक विभागाने मोठी कारवाई करत २० हजार रुपयांची लाच स्वीकारताना तीन जणांना रंगेहात पकडल्याने प्रशासनात खळबळ उडाली आहे. या प्रकरणामुळे पंचायत समिती व समाजकल्याण विभागातील कारभारावर प्रश्नचिन्ह निर्माण झाले आहे.
मिळालेल्या माहितीनुसार, तक्रारदाराने अनुसूचित जाती व नवबौद्ध घटकांच्या वस्ती विकास योजनेअंतर्गत कामासंदर्भात प्रस्ताव सादर केला होता. या प्रस्तावाला मंजुरी देण्यासाठी संबंधित अधिकाऱ्यांनी लाचेची मागणी केल्याची तक्रार लाचलुचपत प्रतिबंधक विभागाकडे करण्यात आली होती.
त्यानुसार सापळा रचून मंगळवारी (दि. २९ एप्रिल) शाहादा येथे कारवाई करण्यात आली. या कारवाईत २० हजार रुपयांची लाच स्वीकारताना
* भूपेंद्र सरदारसिंग राठोड (ग्रामीण गृहनिर्माण अभियंता, पंचायत समिती, शाहादा)
* रमेश मनसाराम बागुल (वरिष्ठ सहायक, समाजकल्याण विभाग)
* चंद्रेश जगजीवनदास शाह (सहाय्यक लेखा अधिकारी, समाजकल्याण विभाग)
यांना ताब्यात घेण्यात आले.
प्रकरणी शाहादा पोलीस ठाण्यात भ्रष्टाचार प्रतिबंधक अधिनियम १९८८ अंतर्गत गुन्हा दाखल करण्यात आला असून पुढील तपास सुरू आहे.
या कारवाईमुळे जिल्ह्यातील शासकीय कार्यालयांमध्ये खळबळ उडाली असून “लाचखोरीविरोधात कारवाई अधिक तीव्र करण्यात येईल” असा इशारा लाचलुचपत प्रतिबंधक विभागाकडून देण्यात आला आहे.
दरम्यान, कोणत्याही शासकीय कामासाठी कोणी लाच मागितल्यास नागरिकांनी त्वरित तक्रार करावी, असे आवाहनही विभागाकडून करण्यात आले आहे.
