नंदुरबार l प्रतिनिधी-
शहादा तालुक्यातील लोणखेडा येथे मित्राचा वाढदिवस साजरा करताना पिस्तूल बाळगत दहशत निर्माण करण्याचा प्रयत्न केल्याचा प्रकार दि. 22 जून रोजी घडला होता. वाढदिवसाचा व्हिडीओ व्हायरल झाल्यानंतर, पोलिसांनी सखोल तपासणीअंती पाच जणांविरोधात गुन्हा दाखल केला आहे.
याबाबत सविस्तर वृत्त असे की, 22 जून रोजी रात्री लोणखेडा गावातील कृष्णा नगरात विशाल युवराज पवार (21) याचा वाढदिवस असल्याने त्याचे मित्र अविनाश विष्णू पवार (23), पवन होमसिंग चौधरी (25), आकाश कालुसिंग पवार (28), विकास विष्णू पवार (24) सर्व रा. मडकाणी ता. शहादा हे आले होते. यावेळी अविनाश विष्णू पवार याने पिस्तुल हातात घेत लोणखेडा गाव आणि परिसरात दहशत निर्माण करण्याचा. प्रयत्न केला होता. या घटनेचा व्हिडीओ सोशल मीडियात व्हायरल झाल्यानंतर त्याची चर्चा सुरू होती. पाचही जणांच्या या कृत्यामुळे गावात भीती पसरली होती. पोलिसांनी व्हिडीओची पडताळणी केली असता वाढदिवस साजरा करताना पिस्तुल बाळगल्याचे स्पष्ट झाल्यानंतर गुन्हा दाखल करण्याची प्रक्रिया करण्यात आली.
याबाबत पोलिस शिपाई युवराज राठोड यांनी शहादा पोलिस ठाण्यात दिलेल्या फिर्यादीवरून विशाल पवार, अविनाश पवार, पवन चौधरी, आकाश पवार, विकास पवार यांच्या विरोधात गुन्हा दाखल आहे. तपास पोलिस उपनिरीक्षक छगन चव्हाण करत आहेत.
