तळोदा l प्रतिनिधी-
अंधश्रद्धे पोटी बिबट्याची कातडी विक्री करणार असल्याची गोपनीय माहितीच्या आधारे मुंबई, व तळोदा वनपरिक्षेत्राच्या पथकाने बनावट ग्राहक तयार करून संयुक्त सापळा रचत तळोदा येथून बिबटची कातडी सोबत चार आरोपी ताब्यात घेत मोठी कामगिरी केली आहे. जप्त करण्यात आलेल्या बिबट्याच्या कातडीची नेमकी किंमत किती हे अजूनही स्पष्ट करण्यात आले नसले तरी या कातडीचा लाखाेंमध्येच सौदा होणार होता अशी माहिती वनविभागाच्या अधिकाऱ्यांच्या आतापर्यंतच्या चाैकशीत पुढे आले आहे.
तळोदा तालुक्यात बिबटचे संख्या मोठ्या प्रमाणात वाढली आहे त्या अनुषंगाने बिबटचे हल्ले व होणाऱ्या मृत्यूच्या अनुषंगाने या ठिकाणी होत असलेल्या बारीक-सारीक हालचालींवरती वनविभाग लक्ष ठेवून होते. तळोदा तालुक्यातील कोठार परिसरात असलेल्या आंबेगव्हाण गावात अंधश्रद्धेला बळी पडलेले चार जण बिबट्याची कातडी विकण्याचा इराद्यात होते. याबाबतची गुप्त माहिती वाईल्ड लाईफ क्राइम कंट्रोल ब्युरोचे प्रतिनिधी व तळोदा वनपरिषद क्षेत्रातील कर्मचाऱ्यांना मिळाली होती त्या अनुषंगाने बनावट ग्राहक तयार करून गुरुवारी सायंकाळी आंबेगव्हाण गावात पाठवले होते, दरम्यान वन विभागाच्या पथकाने त्या ठिकाणी येऊन अधिकची माहिती घेतली असता सदर बिबट्याची कातडी चुकीच्या इराद्याने अंधश्रद्धेला बळी पडून विक्रीसाठी नेली जाणार असल्याची त्यांची खात्री झाली.
त्या अनुषंगाने चार जणांना बिबट्याच्या कातडीची विक्री करण्यासाठी रंगेहाथ ताब्यात घेतले आहे. त्यांच्यावर कायदेशीर कारवाई करण्याची प्रक्रिया रात्री उशिरापर्यंत सुरू होती. मात्र यात त्यांचा म्होरक्या कोण आहे हे दिसुन न आल्याने त्यांच्या म्होरक्याचा शोध वनविभागाकडून सुरु केला आहे.