नंदुरबार l प्रतिनिधी
राज्यात भाजपा, शिंदेची शिवसेना व राष्ट्रवादी यांची युती आहे. महायुतीतर्फे लोकसभा एकत्रितपणे निवडणूक लढवीत आहे असे असले तरी नंदुरबार मध्ये महायुतीमध्ये संघर्ष सुरूच असून जिल्ह्यातील महायुतीतील संघर्षाकडे राज्यस्तरीय नेत्यांनीही पाठ फिरवली आहे. असे असताना आज भारतीय जनता पक्षाच्या व महायुतीच्या उमेदवार डॉ.हिना गावित यांनी महायुतीचे मित्र पक्षातील प्रमुख घटक असलेल्या शिवसेनेचे जिल्हा नेते मा.आ. चंद्रकांत रघुवंशी यांची भेट घेतली त्यांच्यात बंद दाराआड सुमारे अर्धा तास चर्चा करण्यात आली असली तरी संघर्षाला पूर्णविराम वरिष्ठ पातळीवरच होणार असल्याचे निश्चित झाले.
नंदुरबार जिल्ह्यातील भाजपा नेते आदिवासी विकास मंत्री डॉ.विजयकुमार गावित व शिंदे शिवसेनेचे नेते मा.आ.चंद्रकांत रघुवंशी यांच्यात संघर्ष आहे. भाजपाने लोकसभेसाठी डॉ.हिना गावीत यांना उमेदवारी दिली.डॉ.हिना गावीत यांच्या उमेदवारीला शिंदे शिवसेनेतर्फे विरोध होतच होता. शिंदे गटाचे विविध पदाधिकारी हे काँग्रेसच्या रॅलीमध्ये दिसून आले होते तर काही पदाधिकारी उघडपणे काँग्रेसचे उमेदवार ॲड.गोवाल पाडवी यांचा प्रचार करीत आहेत.
दरम्यान आज महायुतीच्या तथा भारतीय जनता पार्टीच्या उमेदवार डॉ. हिना गावित यांनी प्रचाराचा शुभारंभ करून झाल्यावर रॅलीने जात असतानाच एकनाथराव शिंदे गटाच्या शिवसेनेचे नेते माजी आमदार चंद्रकांत रघुवंशी यांच्या कार्यालयात जाऊन त्यांची भेट घेतली आणि आशीर्वाद घेतले. नंदुरबारच्या राजकीय पार्श्वभूमीवर ही घटना शहरवासीयांना धक्का देणारी ठरली आणि त्यामुळेच रघुवंशी व गावित यांची भेट शहरवासीयांच्या चर्चेची सुद्धा बनली.
चंद्रकांत रघुवंशी यांनी याप्रसंगी पुष्पगुच्छ देऊन डॉ. हिना गावित यांना शुभेच्छा दिल्या.यावेळी एकनाथराव शिंदे गटाचे शिवसेनेचे जिल्हाप्रमुख ऍड.राम रघुवंशी, भारतीय जनता पार्टीचे जिल्हाध्यक्ष निलेश माळी, भाजपाचे युवा नेते डॉ.विक्रांत मोरे, आनंदा माळी, माजी गटनेते चारुदत्त कळवणकर, शिंदे गटाच्या शिवसेनेचे माजी नगराध्यक्ष कुणाल वसावे, माजी उपनगराध्यक्ष परवेज खान, रवींद्र पवार आदी उपस्थित होते. यावेळी बंद दाराआड खा. गावित व श्री.रघुवंशी यांच्या मध्ये चर्चा झाली.
चर्च नंतर खा.हिना गावित यांनी दोन दिवसात यावर प्रतिक्रिया देऊ असे सांगितले.
तर मा.आ.चंद्रकांत रघुवंशी यांनी सांगितले की, राज्यात भाजपा व शिंदे शिवसेना एकत्र सतेत्त आहे.मात्र नंदुरबार जिल्ह्यात दोघांमध्ये तीव्र संघर्ष आहे उमेदवारी जाहीर झाल्यानंतर तब्बल दीड महिन्यानंतर उमेदवार खासदार डॉक्टर हिना गावित यांनी आम्हाला आमंत्रण दिले. लवकर आमंत्रण मिळाले असते तर संघर्षाची तीव्रता कमी झाली असती असे सांगत.याबाबतीत आता पर्यंत वरिष्ठांचा फोन आलेला नाही.त्यामुळे याबाबतची भूमिका वरिष्ठ पातळीवरच सुटेल असेही श्री. रघुवंशी म्हणाले.