राम मंदिर प्राणप्रतिष्ठा सोहळ्यानिमित्त शहरातून अभूतपूर्व ऐतिहासिक मोटरसायकल रॅली

नंदुरबार l प्रतिनिधी

‘बोलो बोलो सियावर रामचंद्र की, जय’, ‘पवनसुत हनुमान की, जय’, ‘एक ही नारा एक ही, नाम जय श्रीराम जय श्रीराम’ असा गगनभेदी जयघोषणांनी शहरातून निघालेल्या अभूतपूर्व व ऐतिहासिक मोटरसायकल रॅलीने लक्ष वेधून घेतले होते. जय श्रीरामाचे नारे, वाहनांवर लावण्यात आलेले भगवे भगव्या झेंड्यांमुळे अवघी तरुणाई रस्त्यावर उतरली होती.

अयोध्या येथील श्रीराम मंदिर निर्माण व प्राणप्रतिष्ठा सोहळ्यानिमित्त सकल हिंदू समाजाच्या वतीने रविवारी दुपारी ५ वाजता मोटरसायकल रॅलीला सुरुवात करण्यात आली. रॅली गिरीविहार गेट,उड्डाणपूल, महाराष्ट्र व्यायाम शाळा, सोनार खुंट,जळका बाजार, श्री दादा गणपती,मोठा मारुती मंदिर,अंधारे चौक,आमदार कार्यालय, नगरपालिका मार्गे नेहरू पुतळा पर्यंत काढण्यात येऊन त्या ठिकाणी रघुवंशी परिवाराच्या श्रीराम मंदिर जवळ रॅलीचे विसर्जन करण्यात आले.

‘बोलो बोलो सियावर रामचंद्र की, जय’, ‘पवनसुत हनुमान की, जय’, ‘एक ही नारा एक ही, नाम जय श्रीराम जय श्रीराम’ असा अयोध्यापती श्रीरामांच्या जयघोष करण्यात आला.

चौका-चौकात रॅलीवर पुष्पवृष्टी

शहरातून निघालेल्या अभुतपूर्व मोटरसायकल रॅलीने युवकांमध्ये उत्साह संचारलेला होता. चौका चौकात रॅलीवर पुष्पृष्टी करण्यात आली. रॅलीत अनेक बालकांनी श्रीरामाच्या सजीव देखावा सादर केला होता. त्याचप्रमाणे सजवलेल्या खुल्या ट्रॅक्टरवर श्रीरामाची प्रतिमा ठेवण्यात आली होती.

महिलांच्याही सहभाग

रॅलीत लहान मुलींपासून तर महिलांच्या सहभाग पहायला मिळाला. अनेक महिला पारंपारिक वेशभूषेत तर काही महिलांनी नऊवारी साडी परिधान करून सक्रिय सहभाग नोंदविला.