म्हसावद । प्रतिनिधी
शहादा तालुक्यातील मलोणी येथील एस. ए. मिशन मराठी शाळेत नाताळ सणाच्या निमित्ताने विद्यार्थ्यांनी बहारदार कार्यक्रमाची रंगत आणली. कार्यक्रमाचे अध्यक्ष एस.ए.एम.ट्रस्ट नंदुरबार चेव्हाईस चेअरमन प्रा.संतोष देशपांडे होते. प्रमुख पाहुणे डेव्हिड मोजेस, रेव्हरंड आनंद पटेल, मुख्याध्यापक प्रल्हाद राजभोज, वसतीगृह व्यवस्थापक शिरीष वळवी आदि उपस्थित होते.
प्रथम एस.ए.चर्च चे पास्टर डेव्हिड मोजेस यांनी सर्वांसाठी प्रार्थना केली.रेव्हरंड आनंद पटेल यांनी येशू ख्रिस्त यांच्या जीवनावर आधारित सविस्तर माहिती दिली. कार्यक्रमाचे अध्यक्ष प्रा.संतोष देशपांडे यांनी सांगितले की, नाताळ सण हा संपूर्ण जगभरात येशू ख्रिस्त जन्माच्या निमित्ताने मोठ्या आनंदाने व उत्साहाने साजरा होणारा सण आहे.हा सण मानवी जीवनात आनंद निर्माण करणारा सण म्हणून ओळखला जातो.एक डिसेंबर पासूनच या सणाला सुरूवात होते व एक जानेवारीला नूतनवर्षाचा आरंभ झाल्यानंतर याची सांगता होते.असा आनंद देणारा सण मानवी जीवनात नवचैतन्य निर्माण करतो.
शाळा कॉलेज मधे सुद्धा मोठ्या प्रमाणावर कार्यक्रमाचे आयोजन केले जाते.रोशनाई केली जाते.व ख्रिसमस साजरा केला जातो.असे प्रतिपादन प्रा.संतोष देशपांडे यांनी अध्यक्षीय भाषणात केले.कार्यक्रम प्रसंगी मोठ्या प्रमाणावर विद्यार्थी व पालक उपस्थित होते.कार्यक्रमाचे सुत्रसंचलन सोनाली पाकळे यांनी तर आभार प्रदर्शन भारती शेवाळे यांनी मानले.कार्यक्रम यशस्वीसाठी करण्यासाठी पांडुरंग मराठे, मंगला पाटील, भारती शेवाळे, रविकांता वसावे, भरत पवार, सोनाली पाकळे, नितिन गलराह, अर्चना चर्वतूर व विद्यार्थी, पालक यांनी परिश्रम घेतले.
