नंदुरबार l प्रतिनिधी
आगामी सण / उत्सवाच्या अनुषंगाने नंदुरबार जिल्ह्यात कायदा व सुव्यवस्था अबाधित राहावी तसेच गुन्हेगारांवर वचक राहावा व सण / उत्सव भयमुक्त वातावरणात साजरे व्हावे याकरीता पोलीस अधीक्षक पी. आर. पाटील यांनी जिल्ह्यात कायदा व सुव्यवस्थेसाठी बाधा ठरणारे तसेच मालमत्ता व शरीराविरुध्दचे गुन्हे करणाऱ्या इसमांची माहिती घेवन त्यांचेवर दाखल गुन्ह्यांचा आढावा घेतला असता अक्कलकुवा पोलीस ठाणे हद्दीतील मोहसीन रफीक मक्राणी रा. मक्राणीफळी, अक्कलकुवा ता. अक्कलकुवा हा दहशत व वचक ठेवण्यासाठी नियमितपणे शरीराविरुध्द व मालमत्तेविरुध्दचे गुन्हे करण्याचे सवयीचा असल्याचे त्यांचे निदर्शनास आले.
आरोपी मोहसीन मक्राणी यांच्यापासून सामान्य नागरिकांच्या मालमत्तेस व जिवीतास धोका निर्माण झालेला असून त्याचेवर वेळोवेळी प्रतिबंधक कारवाई करुन देखील त्यांच्या वर्तनात सुधारणा झालेली नाही, म्हणून पोलीस अधीक्षक पी. आर. पाटील यांनी मोहसीन मक्राणी यांच्यावर कठोर प्रतिबंधक कारवाई अक्कलकुवा पोलीस ठाण्याचे पोलीस निरीक्षक दीपक बुधवंत यांना आदेशीत केले होते.
सराईत आरोपी मोहसीन मक्राणी याच्याविरुध्द् अक्कलकुवा पोलीस ठाणे येथे मालमत्ता व शरीराविरुध्दचे एकूण 8 गुन्हे दाखल असल्यामुळे अक्कलकुवा पोलीस ठाण्याचे पोलीस निरीक्षक दीपक बुधवंत यांनी मोहसीन मक्राणी यांच्याविरुध्द् महाराष्ट्र पोलीस कायदा 1951 चे कलम 56 अन्वयेचा प्रस्ताव पोलीस अधीक्षक कार्यालय, नंदुरबार येथे सादर केला होता. सदर प्रस्तावाबाबत पोलीस अधीक्षक पी. आर. पाटील यांनी आढावा घेवुन प्रस्तावाची छाननी केली. तसेच योग्य ती कायदेशीर प्रक्रिया पार पाडून मोहसीन मक्राणी यास 2 वर्ष कालावधीसाठी नंदुरबार जिल्ह्यातून हद्दपार करण्याचा प्रस्ताव तळोदा उप विभागाचे उप विभागीय दंडाधिकारी मंदार पत्की यांच्या कार्यालयात पाठविण्यात आला होता.
तळोदा उप विभागाचे उप विभागीय दंडाधिकारी मंदार पत्की यांनी योग्य ती सर्व कायदेशीर प्रक्रिया पूर्ण करुन मोहसीन रफीक मक्राणी रा. मक्राणीफळी, अक्कलकुवा ता अक्कलकुवा जि. नंदुरबार यास महाराष्ट्र पोलीस कायदा 1951 चे कलम 56 अन्वये 1 वर्ष कालावधीसाठी नंदुरबार जिल्ह्यातून हद्दपार करण्याचे आदेश 7 नोव्हेंबर रोजी दिले आहेत.
हद्दपार आदेशाची अमंलबजावणी तातडीने करण्यात येत असून हद्दपार इसमाने आदेश प्राप्त झाल्यावर 48 तासाचे आत तातडीने जिल्हा हद्दीबाहेर निघून जाण्याबाबत आदेश देण्यात आले आहेत. तसेच हद्दपार इसमांनी नंदुरबार जिल्ह्यात येतांना पोलीस अधीक्षक, तळोदा उप विभागाचे उप विभागीय दंडाधिकारी किंवा न्यायालयाची परवानगी घेणे आवश्यक आहे. हद्दपार आदेशाचे उल्लंघन झाल्यास त्याचे विरुध्द् प्रचलीत कायद्यानुसार कारवाई करण्यात येईल. तसेच हद्दपार इसम नंदुरबार जिल्ह्यात कुठेही दिसून आल्यास तात्काळ डायल – 112, स्थानिक पोलीस ठाणे किंवा पोलीस नियंत्रण कक्ष, नंदुरबार येथे कळवावे असे पोलीस अधीक्षक श्री. पी. आर. पाटील यांनी आवाहन केले आहे.
