नंदुरबार l प्रतिनिधी
रेल्वे स्थानकांच्या आधुनिकीकरणासाठी अमृत भारत योजना सुरू करण्यात आली असून, त्यात भुसावळ-सुरत लोहमार्गावरील महत्त्वाचे स्थानक असलेल्या नंदुरबारचा समावेश करण्याची मागणी शिवसेनेचे संपर्कप्रमुख तथा माजी आमदार चंद्रकांत रघुवंशी यांनी केंद्रीय रेल्वे राज्यमंत्री रावसाहेब दानवे यांना करताच त्यांनी हिरवा कंदील दाखवीत लवकरच पुढील यादीत नंदुरबार रेल्वे स्थानकाच्या समावेश करण्यात येईल असे आश्वासन दिले.
रेल्वे स्थानकांच्या आधुनिकीकरणासाठी राबविण्यात येणाऱ्या ‘अमृत भारत स्थानक’ योजना राबविण्यात येत आहे. त्याच्या शुभारंभ नुकताच पंतप्रधान नरेंद्र मोदी यांच्या हस्ते झाला.या योजनेत महाराष्ट्रातील ४४ रेल्वे स्थानकांचा समावेश असून,भुसावळ-सुरत लोहमार्गावरील महत्त्वाचे स्थानक असलेल्या नंदुरबारचा रेल्वे स्थानकाच्या समावेश नाही. दरम्यान, योजनेच्या आढावा घेण्यासाठी व रेल्वेच्या विविध विकास कामांची पाहणी करण्यासाठी राज्यमंत्री रावसाहेब दानवे भुसावळ-सुरत विशेष दौऱ्यावर आले असता त्यांनी नंदुरबार स्थानकाला धावती भेट दिली.
यावेळी शिवसेनेचे संपर्कप्रमुख तथा माजी आमदार चंद्रकांत रघुवंशी यांनी केंद्रीय रेल्वे राज्यमंत्री रावसाहेब दानवे यांच्याशी रेल्वेच्या विविध प्रश्न व समस्यांविषयी चर्चा करीत नंदुरबार स्थानकाचे नाव अमृत भारत स्थानक योजनेत समावेश करण्याची मागणी केली. यावर दानवे यांनी योजनेच्या पुढील यादीत नंदुरबार स्थानकाचे नाव समाविष्ट करण्यात येईल असे आश्वासन दिले.