नंदुरबार l प्रतिनिधी
नंदुरबार जिल्ह्यात तीन वेगवेगळ्या अपघातात तीन युवक ठार झाल्याची घटना घडल्या आहेत. यामध्ये अक्कलकुवा तालुक्यातील दोन तर शहादा तालुक्यातील एका युवकाचा समावेश आहे.याप्रकरणी वेगवेगळ्या पोलीस ठाण्यात गुन्हे दाखल करण्यात आले आहेत.
याबाबत पोलिस सूत्रांनी दिलेल्या माहितीनूसार, शहादा तालुक्यातील मलोणी रस्त्यावरील मरिमाता मंदिराजवळून अज्ञात वाहन चालकाने रस्त्याच्या परिस्थितीकडे दुर्लक्ष करुन भरधाव वेगाने वाहन चालविले. यावेळी समोरुन येणाऱ्या दुचाकी(क्र.एम.एच.३९ के ४३२५) ला धडक दिली. अपघातात दुचाकीवरील संदिप उर्फ सुनिल चंद्रसिंग बारी (पावरा) (वय २८) रा.कृष्णनगर, लोणखेडा ता.शहादा यास गंभीर दुखापत झाली. उपचारादरम्यान संदिप बारी याचा मृत्यू झाला. वाहन चालक मात्र दुचाकीला धडक दिल्यानंतर घटनास्थळावरुन वाहनासह पसार झाला. याबाबत मुकेश भिमसिंग पावरा रा.दुधखेडा ता.शहादा यांच्या फिर्यादीवरुन शहादा पोलिस ठाण्यात अज्ञात वाहनाचालकाविरोधात भादंवि कलम ३०४(अ), २७९, ३३७, ३३८, मोटार वाहन कायदा कलम १८४, १३४/१८७ प्रमाणे गुन्हा दाखल करण्यात आला आहे.याप्रकरणी पुढील तपास पोहेकॉ.अशोक कोळी करीत आहेत.
तर दुसऱ्या घटनेत दि.२० सप्टेंबर रोजी सायंकाळी ७ वाजेच्या सुमारास अक्कलकुवा तालुक्यातील बिजरीपाटी येथील रोहित पारता पाडवी (वय १८) व मोगऱ्या मिऱ्या वसावे (वय १९ ) रा.मोलगी ता.अक्कलकुवा हे दोघेजण दुचाकी (क्र.एम.एच.३९ एई ६८१६) घेवून जात होते. रोहित पाडवी याने रस्त्याच्या परिस्थितीकडे दुर्लक्ष करुन भरधाव वेगाने वाहन चालविल्याने अपघात घडला. यात मोगऱ्या मिऱ्या वसावे यास गंभीर दुखापत झाल्याने जागीच ठार झाला. तर रोहित पाडवी यास दुखापत झाली आहे. सदरच्या अपघातात दुचाकीचेही नुकसान झाले आहे. याबाबत मिऱ्या इऱ्या वसावे यांच्या फिर्यादीवरुन दुचाकीचालक रोहित पाडवी याच्याविरोधात मोलगी पोलिस ठाण्यात भादंवि कलम ३०४(अ), २७९, ३३७, ३३८, ४२७, मोटार वाहन कायदा कलम १८४ प्रमाणे गुन्हा दाखल करण्यात आला आहे. याप्रकरणी पुढील तपास पोलिस उपनिरीक्षक महाले करीत आहेत.
तिसऱ्या घटनेत अक्कलकुुवा तालुक्यातील मोलगी-काठी रस्त्यावर दि.२० रोजी दुपारी २ वाजेच्या सुमारास बोलेरो वाहन (क्र.एम.एच. ३९/८८५) वरील चालकाने रस्त्याच्या परिस्थितीकडे दुर्लक्ष करुन भरधाव वेगात वाहन चालविले. यामुळे पारशी वळवी यांच्या घराजवळून जात असतांना समोरुन येणाऱ्या ॲपेरिक्षा (क्र.जी.जे.१५ एक्स ९०८३) ला धडक दिली. अपघातात रिक्षात बसलेले लक्ष्मण दोहऱ्या वसावे (वय २७, रा.काठीचा पाटीलपाडा) हे रिक्षातून बाहेर फेकले गेल्याने गंभीर दुखापती झाले. त्यांना जिल्हा रुग्णालयात उपचारासाठी नेत असतांना रस्त्यातच त्यांचा मृत्यू झाला. याबाबत काठी पाटीलपाडा येथील दीपक दोहऱ्या वसावे यांच्या फिर्यादीवरुन चारचाकी वाहन चालकाविरोधात मोलगी पोलिस ठाण्यात भादंवि कलम ३०४(अ), २७९, ३३७, ३३८ प्रमाणे गुन्हा दाखल करण्यात आला आहे. याप्रकरणी पुढील तपास पोहेकॉ.बुनकर करीत आहेत.
