नंदुरबार l प्रतिनिधी
नंदूरबार शहरातील प्रमुख रस्त्यांसह विविध चौफुलींवर सुशोभिकरणांमुळे मोठ्या प्रमाणावर रस्ता व्यापले जात असून वाहतूकीची समस्या निर्माण होण्याची शक्यता लक्षात घेत या बांधकामावर काल बुलडोझर चालला. त्या कामाचे आकार लहान ठेवून सुशोभिकरण तसेच ठेवण्यात येणार असल्याचे पालिका सूत्रांकडून सांगण्यात आले.
नंदुरबार पालिकेच्या प्रभारी मुख्याधिकारीपदी पुलकीत सिंह यांनी कार्यभार घेतल्यानंतर त्यांनी शहरातील अनाधिकृत बांधकामांवर हातोडा घालत अतिक्रमण हटविण्याचा सपाटाच लावला असल्याचे दिसून येत आहे. शहरातील अनेक ठिकाणी असलेले अतिक्रमण मुख्याधिकारी पुलकीत सिंह यांनी हटविले आहे. दरम्यान, असे असले तरी नंदुरबार शहरातील धुळे चौफुली, करण चौफुली, नवापूर चौफुली येथे शहरवासियांसाठी आकर्षण ठरणाऱ्या चौफुलींवर सुशोभिकरण करण्यात आले होते.
मात्र, या सुशोभिकरणामुळे मोठ्या प्रमाणावर रस्ता अडविला जात होता. अवजड वाहनांना वाहने नेतांना कसरत करावी लागत होती. तर बऱ्याचदा अपघाताची शक्यता होती. सदरची बाब लक्षात घेवून वाहतूक समस्या निर्माण होवू नये यासाठी सुशोभिकरणावरील या बांधकामावर काल मुख्याधिकारी पुलकीत सिंह,बांधकाम अभियंता गणेश गावित यांच्या मार्गदर्शनाखाली बुलडोझर चालविण्यात आले. सुशोभिकरण तसेच ठेवून सुशोभिकरणालगत रस्ता व्यापणारे बांधकाम जमिनदोस्त करण्यात आले आहे. दरम्यान, यानंतर पुन्हा दुरुस्ती करुन सुशोभिकरण तसेच राहणार आहे.
चौफुलींवरील बांधकाम कमी करतांना लोकांच्या भावना दुखावणार नाही याची काळजी घेवून वाहतूक सुरळीत व सुरक्षित करण्याचे नियोजन पालिकेच्यावतीने करण्यात आले आहे. दरम्यान, चौफुलींवर बांधकामावर जेसीबी चालत असल्याचे पाहून अनेक नागरिकांना आश्चर्याचा धक्काच बसला होता.
गेल्या काही वर्षांपूर्वी नंदुरबार पालिकेच्याच वतीने शहरातील चौफुलींचे सुशोभिकरण करत आकर्षणाचे केंद्रबिंदू ठरणाऱ्या चौफुलींवर हे बांधकाम पूर्णपणे उदद्धवस्त होते की काय? अशीच भिती अनेकांकडून व्यक्त केली जात होती. तर नेमके सुशोभिकरणावर जेसीबी का चालविला जात आहे? याबाबत सुरुवातीला अनेकांच्या मनात संभ्रम निर्माण झाला होता. मात्र, वाहतूकीचे नियोजन करण्यासाठी सुशोभिकरण तसेच ठेवून रस्ते व्यापणारे बांधकाम निष्काषित करण्यात आले आहे. मुख्याधिकारी पुलकीत सिंह त्यांच्या कार्यकाळात आणखी नेमके कोणत्या बांधकामावर हातोडा चालवतात? व शहर विकासाच्यादृष्टीने आणखी कोणते निर्णय होतात? याकडे मात्र आता लक्ष लागून आहे.