नंदुरबार l प्रतिनिधी
नंदुरबार तालुक्यातील नवे हाटमोहीदा गावात ॲपेरिक्षाने दुचाकीला धडक दिल्याने एकाचा मृत्यू तर एक गंभीर जखमी झाल्याची घटना घडली.
नंदुरबार तालुक्यातील नवे हाटमोहिदा येथील रमेश तुकाराम शिंदे व सुभाष धडू भील हे दुचाकीने (क्र.एम.एच. १८ यू ३५३०) जात होते. यावेळी गौतम सुरेश पवार (रा.जुनेमोहिदा ता.नंदुरबार) याने त्याच्या ताब्यातील ॲपेरिक्षा (क्र.एम.एच. ०३ एएच ६१२५) रस्त्याच्या परिस्थितीकडे दुर्लक्ष करुन भरधाव वेगात ॲपेरिक्षा चालवून हाटमोहिदा गावाच्या मध्यभागी असलेल्या रस्त्यावर दुचाकीला धडक दिल्याने अपघात घडला.
घडलेल्या अपघातात रमेश तुकाराम शिंदे यांचा मृत्यू झाला तर सुभाष धडू भील यांना गंभीर दुखापत झाली. अपघातात दुचाकीचे नुकसान झाले असून अपघातानंतर ॲपेरिक्षा चालक घटनास्थळावरुन पसार झाला. याबाबत रावसाहेब नाना बोरसे यांच्या फिर्यादीवरुन नंदुरबार तालुका पोलिस ठाण्यात गौतम पवार याच्याविरोधात भादंवि कलम ३०४ (अ), २७९, ३३७, ३३८, ४२७ सह मोटार वाहन कायदा कलम १८४, १३४/१८७ प्रमाणे गुन्हा दाखल करण्यात आला आहे. पुढील तपास सहाय्यक पोलिस उपनिरीक्षक भिंगारदे करीत आहेत.
