नंदूरबार l प्रतिनिधी
अक्कलकुवा तालुक्यातील मोलगी ते वडफळी रस्त्यावर सोराचापाडा येथे दुचाकी घसरल्याने एकाचा मृत्यू झाल्याची घटना घडली. याप्रकरणी दुचाकी चालकाविरोधात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, अक्कलकुवा तालुक्यातील बालाघाट येथील पाशा गोमा वसावे हा त्याच्या ताब्यातील दुचाकीवर (क्र.एम.एच.३९ एई ४१८२) जलसिंग गोमा वसावे यांना बसवून मोलगी येथील गाव दिवाळी पाहून घरी जात होते. यावेळी मोलगी ते वडफळी रस्त्यादरम्यान पाशा वसावे याने रस्त्याच्या परिस्थितीकडे दुर्लक्ष करुन भरधाव वेगात दुचाकी चालवून सोराचापाडा येथील मुलांच्या वस्तीगृहाजवळ अचानक दुचाकी घसरल्याने दोघे जण खाली पडली.
यात पाशा वसावे याच्या डोक्याला गंभीर दुखापत झाल्याने मोलगी येथील ग्रामीण रुग्णालयात दाखल केले असता वैद्यकीय अधिकाऱ्यांनी पुढील उपचारासाठी नंदुरबार जिल्हा रुग्णालयात पाठविले. त्यानंतर सुरत येथील नवीन जिल्हा रुग्णालयात दाखल केले असता औषधोपचारादरम्यान पाशा वसावे याचा मृत्यू झाला. याबाबत जलसिंग वसावे यांच्या फिर्यादीवरुन मोलगी पोलिस ठाण्यात मयत पाशा वसावे याच्याविरोधात भादंवि कलम ३०४ (अ), २७९, ३३७, ३३८, ४२७ सह मोटार वाहन कायदा कलम १८४ प्रमाणे गुन्हा दाखल करण्यात आला आहे. पुढील तपास पोहेकॉ.राजेंद्र गावित करीत आहेत.
