नंदुरबार | प्रतिनिधी
नंदुरबार येथील पथराई शिवारात असलेली जमिन विक्री करून तसेच विक्रीनंतर खोटे कागदपत्र सादर करत त्या आधारे बँकेत जमिन पुन्हा तारण ठेवून ४२ लाखांची फसवणूक केल्याप्रकरणी एकाविरूध्द नंदुरबार शहर पोलीस ठाण्यात गुन्हा दाखल करण्यात आला आहे.
याबाबत पोलीस सुत्रांनी दिलेल्या माहितीनुसार, नंदुरबार येथील अमर कॉलनी येथे राहणार्या नारायण जगन्नाथ पाटील याने त्याच्या उपभोगातील पथराई येथील गट क्र.१५२/२ ही दोन हेक्टर असलेले शेत जमिनीवर ४२ लाख रूपये घेवून सदर शेतास तारण ठेवले. कर्जबोजा असतांना देखील मोहनलाल भोई यांना अंधारात ठेवून नंदुरबार शहरातील दुय्यम निबंधक यांच्या कार्यालयात शेताची विक्री केली. दि.२३ डिसेंबर २००४ रोजी नारायण पाटील यांचा चुलतभाऊ शालीग्राम पाटील याने नारायण पाटील व मोहनलाल भोई यांच्याविरूध्द नियमीत दावा दाखल केला. त्यातील आदेशान्वये जमिनीचा ताबा हा मोहनलाल भोई यांच्याकडे देण्यात आला. असे असतांना नारायण पाटील याने सातबारावर नांव असल्याचा फायदा घेत जाणुन बुजून स्वतःचा फायदासाठी नियोजीत कट रचून शेताचा कब्जा व मालकी नसतांना गहाणखत करून दिले.
नारायण पाटील यांचा काही एक संबंध नसतांना मोहनलाल भोई यांची आर्थिक फसवणूक केली तसेच सदर शेत जमिन विकल्यावर बँकेचे कर्जप्रकरणाचे कागदपत्र खोटे करून शेत जमिन तारण घेवून कर्ज घेतले. याबाबत मोहनलाल भोई यांनी नारायण पाटील यांच्याकडे पैशाची मागणी केली असता आता माझ्याकडे पैसे नाही नंतर देतो. असे सांगून अद्यापही पैसे दिले नाही. म्हणून मोहनलाल बन्सीलाल भोई रा.ओमशांतीनगर (नंदुरबार) यांच्या फिर्यादीवरून नंदुरबार शहर पोलीस ठाण्यात नारायण जगन्नाथ पाटील रा.सुरजकेसरी नगर (नंदुरबार) यांच्याविरूध्द भादंवि कलम ४०९, ४२०, ४६७, ४६८, ४७१ प्रमाणे गुन्हा दाखल करण्यात आला आहे. याप्रकरणी पुढील तपास पोसई स्नेहदिप शिंदे करीत आहेत.
