नवापूर l प्रतिनिधी
नवापूर तालुक्यातील नवागाव खांटापाडा, बिजादेवी येथील बांधकाम मजूर स्लॅब भरण्यासाठी साक्री तालुक्यात गेले होते. रात्री उशिरा परत येताना ११ वाजता खोकसा घाटामध्ये मजुरांचे पिकप वाहन, मिक्सर मशीन याचा अपघात झाला आहे. तीव्र उताराच्या वळण घाट रस्त्यात पंधरा फूट खोल पिकअप व मिक्सर मशीन कोसळल्याने अनेक मजूर खाली दाबले गेले. यात दोन मजूर जागीच ठार झाले असून. दहा ते बारा मजूर गंभीर जखमी झाले आहे.
जखमींना 108 रुग्णवाहिकेच्या मदतीने प्राथमिक उपचारानंतर नंदुरबार जिल्हा ग्रामीण रुग्णालयात पुढील उपचारासाठी पाठविण्यात आले आहे.
याबाबत अधिक माहिती अशी की, काल दि
.३० डिसेंबर रोजी रात्री अकरा वाजता अपघात झाल्यानंतर खोकसा गावाचे पोलीस पाटील सुनील गावित व गावकरी यांनी अपघात स्थळी धाव घेऊन मदतीचे कार्य सुरू केले. पोलीस पाटील सुनील गावित यांनी 108 रुग्णवाहिका व विसरवाडी पोलीसांना माहिती देताच प्रशासन घटनास्थळी दाखल होत जखमींना वाचवण्यासाठी मदत कार्य सुरू केले.
जखमींना तत्काळ उपचारासाठी पिंपळनेर येथील 108 रुग्णवाहिका पायलट व डॉक्टर, विसरवाडी 108 रुग्णवाहिका पायलट सुभाष गावित व डॉ. प्रवीण गावित, नवापूर 108 रुग्णवाहिका पायलट विनोद देसाई व डॉ.राहुल सोनवणे यांनी तत्काळ घटनास्थळी दाखल होत. जखमींना प्राथमिक उपचार देऊन पुढील उपचारासाठी जिल्हा ग्रामीण रुग्णालयात पाठविले.
चिचल्ये येथील सरपंचांच्या जेसीबीची मदत घेऊन खोकसा ग्रामस्थ व विसरवाडी पोलिसांनी अपघातात वाहनाखाली दबलेल्या मजूरांना बाहेर काढून मदत केली. रात्री उशिरा तीन वाजेपर्यंत रेस्क्यू ऑपरेशन सुरू होते.
विसरवाडी पोलीस ठाण्याचे सहाय्यक पोलीस निरीक्षक नितीन पाटील, हेड कॉन्स्टेबल हिंदुस्थान नाईक, हेड कॉन्स्टेबल हेमंत खाडे, पोलीस नाईक राजू कोकणी व त्यांचे पथक. अपघात स्थळी दाखल झाले होते. सदर अपघाताबाबत अधिक कार्यवाही विसरवाडी पोलीस करीत आहे.
जखमी मजूरांची नावे प्रीतम विक्रम गावित वय 17, सरिता विक्रम गावित वय 30, संतोष बन्सी गावित वय 20, ईश्वर रामदास गावित वय 30, बन्सी रेवा गावित वय 58, अश्विन दिलीप वळवी वय 30 सर्व रा. नवागाव खांटापाडा, किसन सदाशिव सोनवणे वय 18, किस्मत सदाशिव सोनवणे वय 16, निलेश धरमदास देसाई वय 32 सर्व रा. बिजादेवी तालुका नवापूर हे मजूर जखमी झाले असून. त्यांना पुढील उपचारासाठी नंदुरबार जिल्हा ग्रामीण रुग्णालयात दाखल करण्यात आले आहे. या अपघातात अनिता दिलीप गावित ( वय 25 ) व सुमित्रा मोहन गावित (वय 45) रा. नवागाव खांटापाडा या दोन महिलांचा मृत्यू झाला आहे.
