शिरपूर l प्रतिनिधी
शिरपूर-शिंदखेडा रस्त्यावरील गिधाडे गावालगत असलेल्या तापी नदी पुलावरुन उडी घेत तरूणाने आत्महत्या केल्याची खळबळजनक घटना काल सायंकाळी घडली. हा तरूण नदी बुडत असल्याचा व्हीडीओ देखील सोशल मिडीयावर व्हायरल झाला होता.काल सकाळी त्याचा मृतदेह आढळून आला.
सुरेंद्र सरदारसिंग राजपूत (वय 24 रा. टेंभे बु. ता. धुळे) असे मयत तरूणाचे नाव आहे. तो कृषी कंपनीत मार्केटिंगचे काम करत होता.तो दि.21 रोजी सायंकाळी मोटर सायकलीने गिधाडे गावाजवळील तापी पुलावर आला. पुलावर मोटरसायकल उभी करुन त्याने थेट तापी नदीत उडी घेतली. तेव्हा पुलावरुन जाणार्‍या एकाला तरूण उडी घेतांना दिसताच त्याने आरडाओरड केली. त्यामुळे नागरिक धावून आले.
यादरम्यान तो पाण्यात बुडत असतांनाचा व्हिडीओ यावेळी एकाने काढला. तो सोशल मिडीयावरही व्हायरल झाला. मोटार सायकलवरुन तरुणाची ओळख पटल्यानंतर घटनास्थळी टेंभे येथील ग्रामस्थांनी दाखल झाले. रात्री उशीरापर्यंत तरूणाचा तापी नदीत शोध घेण्यात आला. परंतू तो मिळून आला नाही. आज पुन्हा सकाळपासून शोध सुरू केला असता आठ वाजेच्या सुमारास तरूणाचा मृतदेह पाण्यात मिळुन आला. सुरेंद्र याचा मृतदेह शिरपूर उपजिल्हा रुग्णालयात शवविच्छेदनासाठी दाखल करण्यात आला आहे.
