तळोदा l प्रतिनिधी
तालूक्यातील ग्रामपंचायत निवडणुकीचा कामासाठी नियुक्त कर्मचाऱ्यांनी आपापले निवडणुकीचे साहित्य घेऊन तालुक्यातील ५३ ग्रामपंचायतींच्या मतदानासाठी एकूण ८१० कर्मचारी विविध वाहनाने रवाना झालेत. यावेळी निवडणूक अधिकारी तथा तहसीलदार गिरीष वखारे, नायब तहसीलदार शैलेंद्र गवते यांनी कर्मचाऱ्यांना आवश्यक त्या सूचना दिल्यात.
तळोदा तालुक्यातील ५५ ग्रामपंचायतींसाठी उद्या रविवारी (ता.१६) रोजी बिनविरोध झालेल्या ग्रामपंचायती धानोरा व सोमावल बुद्रुक वगळता प्रत्यक्ष ५३ ग्रामपंचायतींसाठी मतदान होणार आहे. या ५३ ग्रामपंचायतींपैकी मोरवड व चौगाव बुद्रुक येथे सरपंच बिनविरोध निवडून आल्याने त्याठिकाणी फक्त सदस्यांसाठी मतदान होणार आहे.
शनिवारी (ता. १५) सकाळी येथील वामनराव बापूजी मंगल कार्यालयाचा एकूण १४ टेबलांवर नियुक्त कर्मचाऱ्यांनी मतदानाचे साहित्याचे वाटप केले. वेळोवेळी मतदानाचे आपापले साहित्य तपासण्याच्या सूचनाही यावेळी कर्मचाऱ्यांना देण्यात आल्यात. ग्रामपंचायत निवडणुकीसाठी नियुक्त कर्मचारी आपापल्या मतदान केंद्रावर परिवहन महामंडळाच्या १३ बसेस तसेच निवडणूक विभागाने भाडेतत्त्वावर मागवलेल्या ६ मिनी बस (स्कुल बस) व २८ चारचाकी वाहनाने पोलीस बंदोस्तात रवाना झाले.
दरम्यान निवडणूक शांततेत पार पाडावी यासाठी प्रत्येक मतदान केंद्रावर पोलीस कर्मचारी नियुक्त करण्यात आले आहेत. १ पोलीस निरीक्षक, ४ सहाय्यक पोलीस निरीक्षक, ४ पोलीस उपनिरीक्षक, १३३ पोलीस कर्मचारी, १५७ होमगार्ड व १ तुकडी प्लाँटून तैनात असणार आहे. तसेच ८ क्षेत्रीय अधिकाऱ्यांची देखील नियुक्ती करण्यात आलेली आहे. निवडणूक सुरळीत पार पाडण्यासाठी निवडणूक निरीक्षक तथा प्रांताधिकारी शाहूराज मोरे, निवडणूक अधिकारी तथा तहसीलदार गिरीष वखारे, नायब तहसीलदार शैलेंद्र गवते यांसह महसूल कर्मचारी कामकाज पाहत आहेत.
