नंदुरबार l
आगामी काळातील विविध सणांच्या पार्श्वभूमीवर ग्राहकांना शुध्द व दर्जेदार मालाचा, पदार्थाचा पुरवठा करण्यासाठी सर्वांनी सातत्याने प्रयत्न करावेत त्यासाठी ग्राहकांमध्ये जनजागृती करावी अशा सूचना जिल्हाधिकारी मनीषा खत्री यांनी दिल्यात.
जिल्हाधिकारी कार्यालयात अन्न सुरक्षा व मानके कायद्यांतर्गत सनियंत्रण समितीची बैठक पार पडली. बैठकीस जिल्हा पुरवठा अधिकारी महेश शेलार, अन्न व औषध प्रशासनाचे सहाय्यक आयुक्त संतोष कांबळे (अन्न), उपविभागीय पोलीस अधिकारी विश्वास वळवी, जिल्हा उद्योग केंद्राचे व्यवस्थापक दिलीप पाटील, अन्न सुरक्षा अधिकारी आनंद पवार, समाधान बारी, प्रदिप वळवी आदी उपस्थित होते.
जिल्हाधिकारी श्रीमती खत्री म्हणाल्या की, आगामी काळात येणाऱ्या सण, उत्सव काळात भेसळयुक्त पदार्थ मोठ्या प्रमाणात येण्याची शक्यता नाकारता येत नाही. अशा परिस्थितीत अन्नपदार्थामधील भेसळ कशी ओळखावी यासाठी ग्राहकांमध्ये जनजागृती करावी. अन्न सुरक्षा व मानके कायद्यांतर्गत प्रत्येक अन्न व्यावसायिकाने अन्न पदार्थ उत्पादन, साठवण, वितरण, वाहतूक व विक्रीसाठी अन्न व परवाना तथा नोंदणी करणे बंधनकारक आहे. त्यानुसार प्रत्येक अन्न व्यावसायिकांने नोंदणी करावी. जिल्ह्यातील सर्व अन्न आस्थापनाची नियमित तपासणी कराव्यात. बचत गटांना अन्न परवाना व नोंदणी प्रमाणपत्रे देण्याबाबत मार्गदर्शन करावे, अशा सूचना त्यांनी यावेळी दिल्यात.
सहाय्यक आयुक्त श्री. कांबळे यांनी सांगितले, या वर्षांत 1 एप्रिल 2022 पासून अन्न व आस्थापनाची तपासणी करुन नंदुरबार जिल्ह्यात 33 हजार 500 रुपयांचा दंड वसूल करण्यात आला आहे. आगामी सण, उत्सवाच्या पार्श्वभूमीवर जिल्ह्यात तपासणी मोहीम राबविण्यात येवून या मोहिमेच्या माध्यमातून अन्न पदार्थांमध्ये भेसळ करणाऱ्यांवर कठोर करण्यात येईल असे त्यांनी सांगितले.
