नाशिक l
राज्यात दरवर्षी शेती व पुरक क्षेत्रात अति उल्लेखनीय कार्य करणाऱ्या शेतकऱ्यास अथवा संस्थेस पुरस्कार देवून सन्मानित केले जाते. सन 2021 वर्षासाठी डॉ. पंजाबराव देशमुख कृषीरत्न पुरस्कारासाठी व्यक्ती व संस्थांना प्रस्ताव सादर करण्याचे आवाहन नाशिकचे विभागीय कृषी सहसंचालक मोहन वाघ यांनी केले आहे.
डॉ. पंजाबराव देशमुख कृषीरत्न पुरस्कार हा कृषी विभागामार्फत कृषी क्षेत्रात संघटनात्मक, राज्याला दिशादर्शक व अतिउल्लेखनीय कार्य करणाऱ्या व्यक्ती, गट अथवा संस्थेस देण्यात येणारा कृषी क्षेत्रातील सर्वोच्च पुरस्कार आहे. या पुरस्काराचे स्वरूप रूपये 75 हजार, स्मृतीचिन्ह व सपत्नीक/ पतीसह सत्कार असे असून राज्यातून एक असा आहे. हा पुरस्कार माननीय राज्यपालांच्या हस्ते प्रदान केला जातो.
असे आहेत पुरस्कारासाठीचे निकष
प्रस्तावित शेतकरी, गट व संस्था यांना केंद्र किंवा राज्य शासनाचा कोणताही पुरस्कार प्राप्त झालेला असावा. शेतकऱ्याची स्वत:च्या नावावर शेती असावी आणि कुटुंबीयांसह त्याचा शेती हा प्रमुख व्यवसाय असावा प्रस्तावित शेतकरी यशस्वी उत्पादन, रोपवाटिका, सेंद्रिय शेती निविष्ठा उत्पादन व वापर, काढणी पश्चात व्यवस्थापन, साठवणूक व मूल्यवर्धन कृषी प्रक्रिया, निर्यात इत्यादी कार्यात सहभागी होवून परिसरातील शेतकऱ्यांना मार्गदर्शन करणारा असावा. शासनाच्या कृषी विभागाकडून दिल्या जाणाऱ्या राज्यस्तरीय दोन पुरस्कारांमधील अंतर किमान पाच वर्ष असावे. संबंधित शेतकरी केंद्र राज्य शासकीय, निमशासकीय किंवा शासन अंगीकृत संस्थेमध्ये नोकरी करत नसावा किंवा सेवानिवृत्ती वेतन किंवा कोणत्याही प्रकारचे नियमित मानधन घेणारा नसावा.प्रस्तावासोबत सादर करावयाची आवश्यक दस्तावेज
7/12 व 8-अ चा उतारा केंद्र राज्य शासकीय निमशासकीय किंवा शासन अंगीकृत संस्थेमध्ये नोकरी करत नसल्याबाबतचे स्वंयघोषणापत्र मूळ प्रतीतील जिल्हा पोलीस अधीक्षक कार्यालयाचा चारित्र्याचा दाखलासंबंधित शेतकरी / संस्थेला मिळालेले पुरस्कार व कृषी विषयक कार्य दर्शविणारे प्रमाणपत्रे इत्यादी.वरीलप्रमाणे नाशिक विभागातील पात्र इच्छुक शेतकरी, गट व संस्था यांनी अधिक माहितीसाठी आपल्या तालुक्यातील तालुका कृषी अधिकारी कार्यालयाशी संपर्क साधून पुरस्कारासाठी प्रस्ताव सादर करावा, असे विभागीय कृषी सहसंचालक मोहन वाघ यांनी कळविले आहे.
