शहादा
l
तालुक्यातील ७४ ग्रामपंचायतींसाठी सुरू असलेल्या निवडणुकीत आज उमेदवारी अर्ज दाखल करण्यासाठी तहसील कार्यालयात अलोट गर्दी झाली. सरपंच पदासाठी १४५ तर सदस्यांसाठी ४८६ नामांकन अर्ज दाखल झाले. दरम्यान, नामांकन दाखल करण्यासाठी सुटी वगळता एकच दिवस शिल्लक आहे.1 सप्टेंबरला अर्ज दाखल करण्याची अंतिम मुदत असून उमेदवार व समर्थकांनी तहसील आवारात नेमून दिलेल्या पार्किंगच्या जागेवरच शिस्तीने वाहने उभी करण्याचे आवाहन तहसीलदार डॉ मिलिंद कुलकर्णी यांनी केले आहे.
शहादा तालुक्यात ७४ ग्रामपंचायतींचा निवडणूकीची रणधुमाळी सुरु असून निवडणुकीमुळे ग्रामीण भागात वातावरण चांगलेच तापले आहे. ७४ ग्रामपंचायतींसाठी २४६ वार्ड आहेत. निवडणुकीसाठी लागणाऱ्या कागदपत्रांची जमवाजमव करण्यासाठी इच्छुकांची लगबग सुरू असून तहसील कार्यालयाला यात्रेचे स्वरूप आले आहे.
नामांकन सादर करण्यासाठी इच्छुकांसह मोठ्या प्रमाणावर कार्यकर्त्यांची तहसील कार्यालयात गर्दी झाली. चारचाकी वाहनात आपल्या कार्यकर्त्यांना घेऊन उमेदवारी अर्ज सादर केले. ग्रामपंचायतीसाठी इच्छुक असणाऱ्या कार्यकर्त्यांच्या मदतीसाठी राजकीय पक्षाचे तालुकाध्यक्ष ,शहराध्यक्ष कार्यकर्त्यांसमवेत तहसील कार्यालयात हजेरी लावतांना दिसत आहे.
या निवडणुकीत निवडणूक निरीक्षक म्हणून प्रांताधिकारी डॉ. चेतनसिंग गिरासे असून निवडणूक निर्णय अधिकारी म्हणून तहसीलदार डॉ. मिलिंद कुलकर्णी काम पाहत आहेत. निवडणूक शाखेतील नायब तहसीलदार राजेंद्र नांदोडे व कर्मचारी निवडणूक प्रक्रिया सुरळीत पार पाडण्यासाठी मदत करीत आहेत.
