जिल्हा पोलीस दलातर्फे गणेश मंडळांच्या परवानगीसाठी एक खिडकी योजना

नंदूरबार l प्रतिनिधी

31 ऑगस्ट 2022 रोजी पासून गणेशोत्सवाची सुरुवात होणार आहे . गणेशोत्सव काळात गणपती मंडळांना गणेशोत्सवासाठी तात्पुरत्या स्वरुपात सार्वजनिक ठिकाणी मंडप , स्टेज उभारणी करणे , गणेश मंडळाची स्थापना करणे इत्यादी विविध प्रकारच्या परवान्यासाठी मंडळांच्या पदाधिकाऱ्यांना विविध ठिकाणी जावे लागते.

त्यामुळे मंडळाच्या पदाधिकाऱ्यांची गैरसोय होत होती ही बाब लक्षात घेवून नंदुरबार जिल्ह्याचे पोलीस अधीक्षक पी . आर . पाटील यांनी गणेशोत्सव मंडळांना सर्व सुविधा एकाच ठिकाणी मिळण्यासाठी नंदुरबार जिल्हा पोलीस दलातर्फे एक खिडकी योजना नंदुरबार जिल्ह्यातील सर्व पोलीस ठाण्यांमध्ये सुरु करण्याचा निर्णय घेतला आहे .

गणेशोत्सवासाठी तात्पुरत्या स्वरुपात दिल्या जाणाऱ्या परवानगीसाठी गणेश मंडळांनी https://www.mahapolice.gov.in/ या संकेतस्थळावर जावून नागरिकांसाठी विभाग याला क्लीक केल्यानंतर नागरिकांसाठी सेवा यावर क्लिक करावे . त्यानंतर Ganesh Festival Permission Application यावर क्लिक केल्यानंतर Create citizen login यावर माहिती भरल्यानंतर submit करावे .

ऑनलाईन अर्ज सुविधा एक खिडकी योजनेद्वारे करता येईल . गणेशोत्सव मंडळाकडून मंडप , स्टेज किंवा गणेश मंडळ स्थापन परवानगी करीता कोणत्याही प्रकारचे शुल्क नसल्याचे नंदुरबार जिल्ह्य पोलीस अधीक्षक पी. आर . पाटील यांनी सांगितले , ऑनलाईन अर्ज सादर केल्यानंतर संबंधित गणेशोत्सव मंडळ ज्याठिकाणी गणेश मंडळाची स्थापना तसेच स्टेज , मंडप किंवा इतर देखावे उभारणार आहे , त्या जागेची संबंधित पोलीस ठाण्यामार्फत पाहणी केली जाईल .

पायी ये – जा करणाऱ्या लोकांना किंवा वाहनांना त्रास होणार नाही याची खात्री केल्यानंतरच संबंधित गणेश मंडळाला परवाना दिला जाईल . तसेच जिल्ह्यातील सर्व सार्वजनिक गणेश मंडळांनी गणेश मंडळ स्थापन करतेवेळी परवानगी घ्यावी असे आवाहन नंदुरबार जिल्ह्याचे पोलीस अधीक्षक पी . आर . पाटील यांनी केले आहे .

नंदुरबार जिल्ह्याचे पोलीस अधीक्षक पी . आर . पाटील यांनी नंदुरबार शहरातील गणेश विसर्जन मार्ग महात्मा ज्योतीबा फुले पुतळ्यापासून सुरुवात करुन चिराग मशिद , ईलाही चौक , फडके चौकी , जळका बाजार , दोहशाह तकिया व सोनी विहीर पर्यंत पायी फिरुन पाहणी केली . गणपती विसर्जन मार्गाची पाहणी दरम्यान नंदुरबार जिल्ह्याचे पोलीस अधीक्षक पी . आर . पाटील यांनी मिरवणूक मार्गामध्ये महत्वाची ठिकाणे , धार्मिक स्थळे , उभारण्यात येणारी बॅरिकेटिंग यांची पाहणी करुन महत्वाच्या सुचना दिल्या .

तसेच बंदोबस्ताची आखणी कशा प्रकारे असेल याबाबत उपस्थित अधिकाऱ्यांना मार्गदर्शन केले . सदर मार्गाची पाहणी करतेवेळी नंदुरबार जिल्ह्याचे पोलीस अधीक्षक पी . आर . पाटील यांचे सह नंदुरबार विभागाचे उप विभागीय पोलीस अधिकारी सचिन हिरे ,

स्थानिक गुन्हे शाखेचे पोलीस निरीक्षक रविंद्र कळमकर , नंदुरबार शहर पोलीस ठाण्याचे पोलीस निरीक्षक किरणकुमार खेडकर , जिल्हा विशेष शाखेचे पोलीस निरीक्षक भरत जाधव , शहर वाहतूक शाखेचे पोलीस निरीक्षक नरेंद्र भदाणे , पोलीस निरीक्षक अर्जुन पटले , उपनगर पोलीस ठाण्याचे सहा . पोलीस निरीक्षक दिनेश भदाणे व इतर पोलीस अधिकारी उपस्थित होते .