नंदुरबार l प्रतिनिधी
शहरातील चैतन्य चौक, भोई गल्लीजवळ भररस्त्याचा मध्यभागी भलेमोठा असा खड्डा पडला आहे.तसेच याच भागात दोन ड्रेनेजचे झाकण उघडे असल्याने मोठा अपघात होण्याची शक्यता नाकारता येत नाही यासाठी याची तातडीने दुरुस्ती करावी.
अशी मागणी मुख्याधिकारी आणि नगराध्यक्षा यांना निवेदनातून केली या आशयाचे निवेदन प्रशासकीय अधिकारी जयसिंग गावित यांना हिंदु सेवा सहाय्य समितीचे नरेंद्र पाटील, राजू चौधरी, पंकज डाबी यांनी दिले.
या निवेदनात पुढे नमूद केले आहे की, या भागात वाहनांची आणि पादचारींची मोठी वर्दळ असते तसेच या भागात खाजगी शिकवणी वर्गसुद्धा चालतात त्याठिकाणी अनेक लहान मुले शिकवणीसाठी येतात. याच भागामध्ये दर मंगळवारी व्यावसायिक आठवडे बाजारनिमित्त आपले दुकाने लावत असतात.
त्याठिकाणी रस्त्याचा मध्यभागी भलामोठा जीवघेणा खड्डा आहे सदर खड्डा हा वळण रस्त्यावर असल्याने आतापर्यंत अनेक लहान अपघातही झाले आहेत. आता पावसाळा सुरू झाल्याने याच वळण रस्त्यावरून उंच भागातील नवनाथ नगर परीसरातून मोठ्या प्रमाणात पाण्याचा लोंढा वाहून येतो
पाण्याचा मोठ्या लोंढ्यामुळे हा खड्डा लक्षात येत नाही तसेच धर्मदास राजपूत यांचा घराजवळ आणि डॉ.बागुल यांचा घरामागे ड्रेनेजचे झाकण अर्धवट लागत असल्याने त्यात पडून मोठा अपघात होण्याची शक्यता नाकारता येत नाही.
तरी नगरपालिकेने मोठा अपघात होण्याची शक्यता लक्षात घेऊन जीवघेणा खड्डा आणि ड्रेनेजची तातडीने दुरुस्ती करावी अशी मागणी निवेदनातून करण्यात आली आहे.
