नंदूरबार l प्रतिनिधी
नंदुरबार जिल्हा पोलीस दलासाठी अत्याधुनिक गस्त प्रणाली साहित्याचे पोलीस अधीक्षक पी . आर . पाटील यांचे हस्ते वाटप करण्यात आले.
नागरिकांच्या समस्या लक्षात घेता पोलीसांनी सर्व घटनांना जलद प्रतिसाद दिला पाहिजे , पोलीस घटनास्थळी तात्काळ पोहोचून लवकरात लवकर नागरिकांच्या समस्यांचे निराकरण झाले पाहिजे .
पोलीसांबाबत जनतेकडून असलेल्या अपेक्षा पुर्ण करण्यासाठी तसेच पोलीस दलाची जनमाणसातील प्रतिमा उंचावण्यासाठी व प्रत्येक कारवाई परिणामकारक ठरावी याकरीता पोलीसांचा प्रतिसाद जलद राहणे अत्यंत आवश्यक आहे.
यासर्व बाबींचा विचार करुन पोलीस महासंचालक , महाराष्ट्र राज्य , मुंबई यांनी पोलीस दलाचे आधुनिकीकरणाचा भाग म्हणून अत्याधुनिक गस्त प्रणालीचे ( RFID – Radio Frequency Identification Patrolling System ) साहित्यांचे वाटप करण्याचा निर्णय घेतला होता . सद्या गुन्हेगार अत्याधुनिक पध्द्तीचा वापर करुन गुन्हे करीत असल्याचे निदर्शनास आल्याने गुन्ह्यांच्या प्रमाणात देखील वाढ झाली आहे .
तसेच नागरिकांच्या मदतीसाठी किंवा कायदा व सुव्यवस्थेचा प्रश्न निर्माण झाल्यास घटनास्थळी अतिजलद गतीने पोहचता यावे व पोलीस दल आधुनिक , कार्यक्षम व प्रभावी होण्यासाठी अत्याधुनिक गस्त प्रणाली ( Radio Frequency Identification Patrolling System ) साहित्यांचे वाटप नंदुरबार जिल्ह्याचे पोलीस अधीक्षक पी . आर . पाटील यांच्या हस्ते नंदुरबार जिल्ह्यातील सर्व पोलीस ठाणे प्रभारी अधिकारी यांना देण्यात आले .
त्यामध्ये नंदुरबार उप विभागामध्ये 20 , शहादा उप विभागामध्ये 16 , अक्कलकुवा उप विभागामध्ये 12 असे एकुण 48 मशिन व 50 कार्डाचे वाटप करण्यात आले . अत्याधुनिक गस्त प्रणाली ( RFID Patrolling System ) यंत्रणा नंदुरबार जिल्ह्यात सक्रीय करुन जिल्ह्यातील सर्व पोलीस ठाणे हद्दीत असलेले महत्वाचे ठिकाण , शाळा , महाविद्यालय , धर्मस्थळे , मिश्र वस्ती ,
संवेदनशिल भाग , बँक , ATM , सराफ बाजार , बस स्थानक , रेल्वे स्थानक , बाजारपेठ , गर्दीचे ठिकाण इत्यादी ठिकाणी अत्याधुनिक गस्त प्रणालीचे ( RFID Patrolling System ) यंत्रणा कार्यान्वीत करण्यात आलेली आहे .
अत्याधुनिक गस्त प्रणालीमुळे ( RFID Patrolling System ) अचानक एखादी घटना उद्भवल्यास तात्काळ त्याठिकाणी पोलीस मदत मिळण्याकरीता ह्या यंत्रणेचा उपयोग होणार आहे अशी माहिती नंदुरबार जिल्ह्याचे पोलीस अधीक्षक पी . आर . पाटील यांनी सांगितले .
सदर कार्यक्रमाच्या वेळी नंदुरबार जिल्ह्याचे पोलीस अधीक्षक पी . आर . पाटील , अपर पोलीस अधीक्षक विजय पवार , पोलीस उप अधीक्षक ( मुख्यालय ) विश्वास वळवी , उप विभागीय पोलीस अधिकारी , नंदुरबार सचिन हिरे , उप विभागीय पोलीस अधिकारी , शहादा श्रीकांत घुमरे ,उप विभागीय पोलीस अधिकारी , अक्कलकुवा संभाजी सावंत तसेच इतर पोलीस ठाण्यांचे प्रभारी अधिकारी उपस्थित होते .