खेतिया l प्रतिनिधी
अखिल भारतीय गुर्जर महासभेचे राष्ट्रीय अधिवेशन दि. 22 मे रोजी सकाळी दहा वाजता मध्यप्रदेश राज्यातील इंदौर येथील जाल सभागृह, साऊथ तुकोगंज येथे आयोजित करण्यात आले आहे.
अखिल भारतीय गुर्जर महासभेचे राष्ट्रीय अध्यक्ष दीपक पुरुषोत्तम पाटील यांच्या अध्यक्षतेखाली राष्ट्रीय अधिवेशन दि. 22 मे रोजी होणार असून यावेळी राज्यपाल मंगूभाई पटेल, मध्यप्रदेशचे मुख्यमंत्री शिवराजसिंह चौहान, उत्तराखंडचे राजा कुंवर प्रणवसिंह यांच्यासोबतच गुर्जर समाजाचे देशभरातील खासदार, आमदार, लोकप्रतिनिधी, गुर्जर महासभेचे राष्ट्रीय पदाधिकारी, विविध राज्यातील पदाधिकारी सहभागी होतील. अधिवेशनात सामाजिक, राजकीय, शैक्षणिक विकासाच्या मुद्द्यांवर विचारविनिमय करण्यात येऊन ठराव संमत केले जाणार आहेत. या अधिवेशनात विविध क्षेत्रात उल्लेखनीय कार्य करणाऱ्या समाजबांधवांसह शासकीय- निमशासकीय सेवेत कार्यरत असलेल्या अधिकारी व कर्मचाऱ्यांच्या सत्कार करण्यात येणार आहे. या अधिवेशनात ज्या प्रमुख मुद्द्यांवर चर्चा करण्यात येणार आहे त्यात गुर्जर रेजिमेंटची स्थापना करणे, भगवान देव नारायण यांच्या अवतरण दिनानिमित्त केंद्र व राज्य सरकारतर्फे विशेष उपक्रम राबवणे, त्यांच्या स्मृतीनिमित्त टपाल तिकीट व नाणी तयार करणे यांचा समावेश आहे. या राष्ट्रीय अधिवेशनाच्या यशस्वीतेसाठी अखिल भारतीय गुर्जर महासभेच्या मध्यप्रदेश अध्यक्ष राजेंद्रसिंह गुर्जर, राष्ट्रीय उपाध्यक्ष गोपालसिंह गुर्जर यांच्या मार्गदर्शनाखाली स्थानिक पदाधिकारी कार्यरत असल्याची माहिती महासभेचे महामंत्री सुनील पाटील यांनी दिली आहे.
