नंदुरबार | प्रतिनिधी
तामिळनाडू राज्यातील विशाखापट्टनम येथील एकाला देवाची लाकडी मुर्तीची आमिष दाखवून विश्वास संपादन करून १ लाख ७२ हजाराची फसवणूक करून दुखापत करीत जबरी चोरी केल्याप्रकरणी अज्ञात चार जणांविरूध्द नंदुरबार शहर पोलीस ठाण्यात गुन्हा दाखल करण्यात आला आहे.
याबाबत पोलीस सुत्रांनी दिलेल्या माहितीनुसार, जिंगाली रविंद्र यादव रा.नंदामुरारीनगर विशाखापट्टनम (तामिळनाडू) हा जानेवारी २०२२ च्या सुरूवातीपासून अकोला स्टेशनपास केल्यानंतर त्याचा मोबाईल क्रमांकावर करण पवार या इसमाने ५० हजार रूपयाची विष्णु भगवानाची एकलाकडी मुर्ती ही २५ हजाराचा देतो असे आमिष दाखवन जिंगाली यादव यांच्या विश्वास संपादन करून फोनपेद्वारे वेळोवेळी २० हजार रूपयापेक्षा जास्त रक्कम पाठविली. तसेच नंदुरबार शहरातील गौरवप्लाजा येथे दोनवेळा एक हजार रूपयाप्रमाणे पैसे घेवून त्यानंतर पुन्हा करण् पवार इसमाचा मित्र मनोज पवार याने तीच मुर्ती पाहिजे असल्यास दिड लाख रूपये लागतील असे सांगितले. त्यानंतर जिंगाली यादव याने नंदुरबार शहरातील बसस्थानक परिसरात असलेल्या एचडीएफसीच्या एटीएममधून पैसे काढून दिड लाख रूपये जमविले त्यानंतर दि.६ मे रोजी दुपारी १२.५० वाजेच्या सुमारास मनोज पवार तेथे आला व त्याने जिंगाली यादव याला मोटरसायकलवर बसून नेहरूचौक गांधीपुतळा येथून उड्डाणपुलवरून जात प्रकाशा येथील तापी नदीवरील ब्रीजकडे घेवून गेला. त्यानंतर खाली उतरून बरेच पुढे नेल्यानंतर मनोज पवार याचे दोन अनोळखी साथीदार त्याठिकाणी आले. त्यातील एकाने जिंगाली यादव याला सुरा दाखवून आम्हाला पैसे देवून टाका अशी धमकी देवून पोटात बुक्का मारला तर दुसर्याने जोरात लाथ मारत जिंगाली यादव याच्याकडील दिड लाख रूपये रोख व १० हजार रूपये किंमतीचा मोबाईल लंपास केला. याप्रकरणी जिंगाली रविंद्र यादव याच्या फिर्यादीवरून नंदुरबार शहर पोलीस ठाण्यात मोबाईल धारक करण पवार, मनोज पवार तसेच अज्ञात दोन अनोळखी इसमाविरूध्द भादंवि कलम ४२०, ३९४, ५०६, ३४ प्रमाणे गुन्हा दाखल करण्यात आला आहे. याप्रकरणी पुढील तपास पोलीस निरीक्षक किरणकुमार खेडकर करीत आहेत.