तळोदा l प्रतिनिधी
तळोदा तालुक्यातील झिरी पाठडी शिवारात शेतातील कामे करत असताना युवकावर बिबट्याने प्राणघातक हल्ला केला.या अपघातात युवक गंभीर जखमी झाला असून पुढील उपचारासाठी त्याला तातडीने जिल्हा रुग्णालय नंदुरबार येथे हलविण्यात आले. ही घटना बुधवारी दुपारी १ वाजेच्या सुमारास घडली.
याबाबत अधिक माहिती अशी की,झिरी पाठडी ता. तळोदा येथे राहणारा युवक हेमंत सना पाडवी वय 35 हा शेतमालक कोटा दिवल्या पाडवी यांच्या शेतात काम करत असताना शेतात कामे करत होता.त्या दरम्यान त्याच्यावर बिबट्याने अचानक हल्ला चढविला.या हल्ल्यात बिबट्याने हेमंतच्या पाठीवर पंज्याने वार केल्याचे दिसुन येते.तसेच त्याच्या हातापायावर मुक्का मार लागला आहे.या हल्ल्याप्रंसंगी बिबट्यासोबत त्याचे पिल्लू देखील असल्याचे सांगण्यात येत आहे.हल्ला दरम्यान हेमंतने आरडा-ओरड केल्यामुळे आवाज ऐकून शेजारच्या शेतात काम करणाऱ्यांनी घटनास्थळी धाव घेतली व की बिबट्याला हुसकावून लावून जखमी झालेल्या हेमंतला तातडीने तळोदा येथील उपजिल्हा रुग्णालयात आणण्यात आले. मात्र पाठीवर खोलवर पंजे लागल्यामुळे रक्तस्त्राव अधिक होत असल्याने त्यांना तातडीने जिल्हा रुग्णालय नंदुरबार येथे हलविण्यात आले आहे.हल्लेखोर प्राणी हा बिबट्या नसून पट्टेदार वाघ असल्याचे प्रत्यक्षदर्शीची म्हणणे आहे.
