नंदुरबार l प्रतिनिधी
तालुक्यातील ढंढाणे रस्त्याने रनाळेकडे जाणाऱ्या दुचाकीस्वारास अडवून त्यांच्याकडून सुमारे सव्वा दोन लाख रुपयांची रोकड असलेली बॅग जबरीने हिसकावून नेल्याप्रकरणी अज्ञात दोघांविरोधात गुन्हा दाखल करण्यात आला आहे.
याबाबत अधिक माहिती अशी की,
दोंडाईचा येथील व्यापारी शामलाल बोथरा यांचे होलसेल घेतली. किराणा दुकान आहे. त्यांच्याकडून नंदुरबार तालुक्यातील वैंदाणे, खर्दे, तलवाडे, बलवंडसह इतर खेड्यांतील दुकानदार किराणा माल घेऊन जातात. या मालाच्या उधारीची वसुली करण्यासाठी बोथरा यांच्याकडे काम करणारे नेहमीच येत असतात. शनिवार १६ रोजी देखील त्यांच्याकडील काम करणारे साहेबराव उत्तम महाजन, रा. दाऊळ, ता. शिंदखेडा हे वसुलीसाठी दुचाकी (एमएच १८ बीजे ०९२०) वरून गेले होते. सकाळी त्या गावातील वसुली करून महाजन हे दुचाकीने ढंढाणे ते रनाळे रस्त्याने जात होते.
सामसूम रस्ता असल्याचे पाहून त्यांच्या मागून आलेल्या दुचाकीवरील दोघांनी त्यांच्या जवळील दोन लाख १८ हजार ५०० रुपये असलेली बॅग हिसकावण्याचा प्रयत्न केला. महाजन यांनी विरोध केला असता दुचाकी थांबवून त्यांना मारहाण करण्यात आली. त्यांच्या हाताला चावा घेऊन बॅग घेऊन दोघे पसार झाले. शिवाय त्यांच्या दुचाकीची चावीदेखील काढली.महाजन यांनी ही बाब आपल्या मालकाला सांगितली. त्यानंतर तालुका पोलिसांना कळविण्यात आले. याबाबत साहेबराव महाजन यांनी फिर्याद दिल्याने दोघा अज्ञातांविरुद्ध जबरी चोरीचा गुन्हा दाखल करण्यात आला आहे. तपास सहायक पोलीस निरिक्षक योगेश चौधरी करीत आहे.
