नंदुरबार l प्रतिनिधी
तळोदा शहरातील दावलशा बाबा मुलींच्या बालगृहातून तीन अल्पवयीन मुलींचे अपहरण केल्याप्रकरणी तळोदा पोलिस ठाण्यात अज्ञाताविरुद्ध गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, तळोदा शहरात दावलशा बाबा मुलींचे बालगृह आहे. सदर बालगृहातून अज्ञाताने फूस लावून काहीतरी आमीष दाखवून तीन अल्पवयीन मुलींचे अपहरण केले आहे. सदरच्या घटनेने खळबळ माजली आहे. अपहृत मुलींमध्ये एका ११ वर्षीय, १३ वर्षीय व १७ वर्षीय मुलीचा समावेश आहे. याबाबत बालगृह अधिक्षिका मनिषा किसन गावित यांच्या फिर्यादीवरुन तळोदा पोलिस ठाण्यात अज्ञाताविरुद्ध भादंवि कलम ३६३ प्रमाणे गुन्हा दाखल करण्यात आला आहे. पुढील तपास महिला पोलिस उपनिरीक्षक प्रिया वसावे करीत आहेत.