नंदुरबार | प्रतिनिधी
शहादा तालुक्यातील लोंढरे येथील एका शेतकरी कुटूंबातील आई, वडील व मुलाने तापी नदीपात्रात उडी मारून आत्महत्या केली होती. आत्महत्येस प्रवृत्त केल्याप्रकरणी पत्नी व सासूस अटक करण्यात आली आहे.
याबाबत अधिक माहिती अशी की, शहादा तालुक्यातील लोंढरे येथील राधिका गोपाल वाघ या संशयीत आरोपीने तिचा पती गोपाल वाघ याच्याशी वेळोवेळी भांडण करून शिवीगाळ करून दमदाटी केली. यासह गोपाल वाघ याची आई सकुबाई यांना हाताबुक्यांनी मारहाण केली. याला कंटाळून गोपाल नथा वाघ, नथा बुधा वाघ व सखुबाई नथा वाघ तिघे रा.लोंढरे (ता.शहादा) यांनी दि.२२ जुलै रोजी रात्री १० वाजेच्या सुमारास शिंदखेडा तालुक्यातील सुखवद येथे तापी नदीच्या पात्रात उडी मारून आत्महत्या केली. या घटनेत गोपाल नथा वाघ यांच्या मृतदेह मिळून आला आहे. मात्र त्याचे आई, वडील यांचा मृतदेह अद्याप मिळालेला नाही. त्यांचा शोध घेण्यात येत आहे. या प्रकरणी संजय नथा वाघ रा.लोंढरे (ता.शहादा) यांच्या फिर्यादीवरून शहादा पोलीस ठाण्यात मयत गोपालची पत्नी राधिका गोपाल वाघ रा.लोंढरे (ता.शहादा) व सासूबाई कमलबाई हिंमत खलाणे रा.सोनवद (ता.शहादा) यांच्या विरूध्द भादंवि कलम ३०६, ३२३, ५०४, ५०६, ३४ प्रमाणे गुन्हा दाखल करून दोघ संशयीत आरोपी राधिका गोपाल वाघ व कमलबाई हिंमत खलाणे यांना अटक करण्यात आली आहे. याप्रकरणी पुढील तपास विक्रांत कचरे करीत आहेत.
