नंदुरबार | प्रतिनिधी
शबरी आदिवासी वित्त विकास महामंडळ कार्यालय नंदुरबार अंतर्गत वैयक्तिक कर्ज लाभार्थ्यांची गेल्या दोन वर्षापासून शाखा प्रबंधक अधिकारी आर. एस. भदाने यांनी फसवणूक केल्याचा धक्कादायक प्रकार समोर आला आहे. प्रकल्प अधिकार्‍यांच्या माहितीनुसार शाखा प्रबंधक आर. एस. भदाने यांना निलंबित केल्याची माहिती दिली आहे.
शबरी आदिवासी वित्त विकास महामंडळ कार्यालयात नवापूर तालुक्यातील ११५ लाभार्थ्यांनी किराणा दुकान, गॅरेज, शेतीविषयक आदी व्यवसायांसाठी १ ऑगस्ट २०२० रोजी अर्ज सादर केले होते. गेल्या दोन वर्षात संबंधित अधिकारी आर. एस. भदाने यांनी अर्जाबाबत प्रोजेक्ट रिपोर्ट व आदी सर्व कागदपत्रे लाभार्थ्यांकडून घेतली, मात्र लाभ दिलेला नाही. सदर योजने बद्दल विचारले असता अधिकार्‍यांकडून नेहमी उडवाउडवीची उत्तरे देण्यात आली. याबाबत आदिवासी विकास प्रकल्प अधिकारी मीनल करणवाल यांना विचारले असता संबंधित अधिकारी आर एस भदाने निलंबित झाले असून दुसर्‍या अधिकार्‍यांना कार्यभार सोपवल्या नंतर याबाबत अधिक माहिती दिली जाईल असे सांगण्यात आले. मात्र आर.एस. भदाने यांना कोणत्या कारणावरून निलंबित केले याबाबतही स्पष्ट बोलण्यास मीनल करणवाल यांनी नकार दिला.
गेल्या दोन वर्षापासून या योजनेसाठी अर्ज सादर करणारे उच्च शिक्षित बेरोजगार असून आम्हाला योजनेचा लाभ कधी व कसा मिळेल याबाबत स्पष्ट उत्तर द्यावे असे प्रकल्प अधिकारी मीनल करणवाल यांना विचारले असता मी शाश्‍वती देऊ शकत नाही असे उत्तर त्यांनी दिले. त्यामुळे शबरी आदिवासी वित्त विकास महामंडळामध्ये चाललंय तरी काय असा सवाल उपस्थित होत आहे.
लाभार्थ्यांनी याबाबत शबरी वित्त विकास महामंडळ कार्यालयाला देखील तपास केला असता कार्यालयाला कुलूप आढळून आले. तसेच संबंधित अधिकारी निलंबित झाले असून तुषार वाघ यांच्याकडे कार्यभार सोपविण्यात आल्याची माहिती दिली आहे. परंतु ते धुळे येथे मीटिंग निमित्त गेल्यामुळे पर्याप्त माहिती मिळू शकली नाही.
गेल्या दोन वर्षात लाभार्थ्यांचे अर्ज सादर करण्या पासून या योजनेचा तपास करण्यासाठी जवळपास वैयक्तिक दहा हजार रुपये खर्च झाले असून संबंधित विभागाने लाभ न दिल्यास तीव्र आंदोलन छेडण्याचा इशारा दिला आहे. नंदुरबार जिल्ह्यातील तळोदा प्रकल्पाअंतर्गत शबरी आदिवासी वित्त विकास विभागाकडे जवळपास ५७ लाभार्थ्यांनी अर्ज सादर केले होते त्यांना कर्जाचे वाटप करून लाभ देण्यात आला आहे. मात्र नंदुरबार प्रकल्पातील शहादा, नंदुरबार, नवापूर तालुक्यातील असंख्य लाभार्थ्यांना या योजनेचा लाभ मिळालेला नाही त्यामुळे गेल्या दोन वर्षात संबंधित अधिकारी आर. एस. भदाने यांनी काय काळाबाजार केला व त्यांच्यावर निलंबनाची कारवाई का करण्यात आली याबाबत प्रकल्प अधिकारी मीनल करणवाल यांनी बोलण्यास नकार दिला असला तरी आर. एस. भदाने यांच्याद्वारे शबरी आदिवासी वित्त विकास विभागात मोठा भ्रष्टाचार केला असल्याची चर्चा सुरू आहे. तसेच कर्जासाठी अर्ज सादर करणार्‍याकडून देखील पैसे उकळल्याची माहिती समोर येत आहे.विशेष म्हणजे शबरी आदिवासी वित्त विभाग कार्यालयाच्या फलकावर वैयक्तिक कर्ज लाभार्थ्यांसाठी योजना उपलब्ध नसल्याचे सूचना लावण्यात आली आहे. तसेच निधी परत गेल्याच्या देखील बोलले जात आहे त्यामुळे मार्च महिना पूर्ण न होताच निधी परत कसा गेला असा सवालही लाभार्थ्यांनी उपस्थित केला आहे याबाबत जोपर्यंत योग्य उत्तर मिळत नाही तोपर्यंत लढा सुरू राहील तसेच उद्या प्रकल्प कार्यालयावर आंदोलनाचा इशारा शबरी आदिवासी वित्त विकास विभागाला अर्ज सादर करणार यांनी दिला आहे.
