नंदूरबार l प्रतिनिधी
जागतिक महिला दिनी जिल्हा परिषद नंदुरबार च्या अध्यक्षा ॲडव.सिमा वळवी यांच्या हस्ते वृषाली नरेंद्र खैरनार लिखित ‘दुष्टचक्र’ या कथासंग्रहाच्या दुसऱ्या आवृत्तीचे प्रकाशन झाले. यावेळी उपाध्यक्ष ॲड. राम रघुवंशी, गणेश पराडके, निर्मला राऊत, उप मुख्य कार्यकारी अधिकारी डॉ.वर्षा फडोळ , प्रविण पवार हे मान्यवर उपस्थित होते.
धडगाव, नवापूर सारख्या आदिवासी भागात अंगणवाडी पर्यवेक्षिका म्हणून कार्यरत असलेल्या वैशाली पाटील ऊर्फ वृषाली नरेंद्र खैरनार ह्या आदिवासी स्त्रीयांच्या समस्या जाणून समुपदेशकाच्या भूमिकेतून काम करीत आहेत. अशावेळी आलेल्या वेगवेगळ्या अनुभवांना कथेचे स्वरुप देत त्यांनी या संग्रहाची निर्मिती केली आहे. यासोबतच वृषाली खैरनार ह्या मराठी व अहिराणी भाषेतून उत्तम कथाकथन करतात. यापूर्वी धुळे व जळगाव आकाशवाणी केंद्रावरून ‘दुष्टचक्र’ कथासंग्रहातील बहुतांश कथांचे प्रसारण झालेले आहे.
डिसेंबर २०२१ मध्ये महाराष्ट्र राज्य साहित्य व संस्कृती मंडळाच्या अनुदानातून प्रकाशित झालेल्या या कथासंग्रहाच्या पहिल्या आवृत्तीला भरभरून प्रतिसाद लाभला. त्याविषयी गौरव करताना प्रकल्प अधिकारी रणजित कु-हे म्हणाले, ‘नंदुरबार जिल्ह्यातील आदिवासी व ग्रामीण स्त्रीयांच्या समस्यांना अधोरेखित करण्याचे काम या संग्रहातील कथांनी केले आहे.’ अं.पर्यवेक्षिका संघटनेच्या धडाडीच्या कार्यकर्त्या चैताली आव्हाड यांनी कथासंग्रहा विषयी कौतुक करीत सर्व पर्यवेक्षिकांच्या उपस्थितीत वृषाली खैरनार यांना सन्मानित केले.
महिला व बालविकास प्रकल्पाने आयोजित केलेल्या या कार्यक्रमाला नंदुरबार जिल्ह्यातील प्रकल्प अधिकारी संजय कोंडार, मोलाणे, कमलेश महाले, निलिमा मंडपे व अं.सेविका, जि.प.चे कर्मचारी, मोठ्या संख्येने उपस्थित होते.
