म्हसावद l प्रतिनिधी
उत्तर महाराष्ट्र विद्यापीठ जळगाव आणि कला वाणिज्य व विज्ञान महाविद्यालय तळोदा यांच्या विद्यमाने आयोजित राष्ट्रीय सेवा योजनेच्या सात दिवसीय निवासी श्रमसंस्कार शिबिराच्या बौद्धिक सत्रात “स्पर्धा परीक्षा आणि आजचा तरुण ” या विषयावर डॉ.जी. एम. मोरे यांनी मार्गदर्शन केले.
यावेळी डॉ. जी. एम. मोरे यांनी राष्ट्रीय सेवा योजनेच्या स्वयंसेवकांना आजच्या स्पर्धात्मक युगामध्ये युवकांनी जो करियरसाठी प्रशासकीय सेवेचा मार्ग मार्ग निवडला आहे तो प्रतिष्ठेचा असला तरी त्या मार्गात अनेक संघर्षात्मक प्रसंग असल्याचे प्रतिपादन केले. विद्यार्थ्यांनी स्पर्धा परीक्षा देताना अशा आव्हानात्मक संघर्षाला धैर्याने सामोरे गेले पाहिजे आणि आपले उचित ध्येय साध्य केले पाहिजे असे त्यांनी आपल्या मनोगतामधुन व्यक्त केले. प्रत्येक विद्यार्थ्यांनी कुठल्याही करिअरचा मार्ग निवडताना आपल्या स्वतःचे अँनलीसीस करायला हवे. याआधारे युवकांना योग्य तो मार्ग निवडायला मदत होते तसेच आपल्यातील सामर्थ्य व कमतरता यांची माहिती होत असल्याने आव्हानांवर मात करून विजयाचा मार्ग सर करण्यास मदत होते असे ते म्हणाले. विद्यार्थ्यांनी स्पर्धा परीक्षेमध्ये अपयश आल्यास खचून न जाता आपला बी प्लान देखील निश्चित केलेला असावा असे त्यांनी आवर्जून सांगितले. यावेळी स्वयंसेवकांनी स्पर्धा परीक्षेसंबंधी विचारलेल्या प्रश्नांना उत्तरे दिली. याप्रसंगी राष्ट्रीय सेवा योजनेचे कार्यक्रम अधिकारी प्रा. पी एल सोनवणे सहाय्यक कार्यक्रम अधिकारी डॉ. पी.व्ही तट्टे, महिला कार्यक्रमाधिकारी डॉ. सुनिता गायकवाड यासह शिबिरार्थि स्वयंसेवक उपस्थित होते. कार्यक्रमाचे सूत्रसंचालन कुमारी रोशनी कोळी हिने केले तर आभार श्रुती शहा हिने केले.
