नंदुरबार l प्रतिनिधी
नंदुरबारातील कंजरवाडा भागात मुलीला अश्लील मेसेज पाठविण्याच्या वादातून जमावाने मारहाण करून घर जाळण्याची घटना घडली. घटनेत तीनजण जखमी झाले आहेत. याप्रकरणी नंदूरबार शहर पोलीस ठाण्यात जमावाविरुद्ध गुन्हा दाखल करण्यात आला आहे.
याबाबत पोलीस सूत्रांनी दिलेल्या माहितीनुसार, नंदूरबार शहरातील कंजरवाडा भागात राहणाऱ्या १९ वर्षीय मुलीस तेथीलच जयदीप राकेश काशिकर याने मोबाईलवर अश्लील मेसेज पाठविला होता. त्यावरून मुलीचे कुटुंबीय आणि काशिकर कुटुंबीय यांच्यात वाद झाला होता. दि.२२ फेब्रुवारी रोजी रात्री दोन वाजेच्या सुमारास जमाव जमवून मुलीच्या घरी गेले. अनिल काशिकर यांनी दरवाजा ठोठावून वाद मिटवून टाकू म्हणून सांगितले. त्यामुळे मुलीच्या वडिलांनी दरवाजा उघडताच त्याने लाकडी स्टम्पने डोक्यावर वार केला.आकाश काशिकर यानेही मारहाण केली. घरात घुसून दरवाजे, टीव्ही, संसारोपयोगी साहित्य यांची तोडफोड केली. घरातील मुलीची आई, भाऊ यांनाही मारहाण करण्यात आली. घरासमोरील लहान मालवाहू वाहन (एमएच १८ एए ३०३३), दोन दुचाकी करीत आहेत. (जीजे ०१ एफझेड २०२५ व एमएच १८ ७८५९) या वाहनांचेदेखील नुकसान केले. २७ फेब्रुवारी रोजी रात्री पुन्हा यातील काहीजण आले व त्यांनी घर जाळून टाकले. याप्रकरणी मुलीच्या फिर्यादीवरून अनिल शांतीलाल काशिकर, करण अनिल काशिकर, आकाश मोहन काशिकर, जयदीप राकेश काशिकर, कालू प्रेम तमायचेकर, विक्की शंकर काशिकर सर्व रा. कंजरवाडा यांच्याविरुद्ध भादंवि कलम ४३६,३२४,५४२ , ३२३,५०४, ५०६ १४३,१४७,१४८ .१४ ९ सह माहिती तंत्रज्ञान अधि . ६७ सह महा . पो . का कलम ३७ ( १ ) , ( ३ ) चे उल्लंघन १३५ प्रमाणे गुन्हा दाखल करण्यात आला आहे. याप्रकरणी पुढील तपास पोलीस निरिक्षक किरणकुमार खेडकर करीत आहेत.
