तळोदा l प्रतिनिधी
अक्कलकुवा येथील बीएसएनएल् कार्यालयातील इंजिन रुमचा दरवाजा तोडुन सुमारे २० हजार रुपये किंमतीचे अलटरनेटर अज्ञात चोरट्याने चोरुन नेले आहे.याबाबत अक्कलकुवा पोलीस स्टेशनला गुन्ह्याची नोंद करण्यात आली आहे.
याबाबत पोलीस सूत्रांनी दिलेल्या माहिती वरुन सविस्तर वृत्त असे की,दि.15 रोजी संध्याकाळी साडे 5 वाजेनंतर ते दि. 16 रोजी 1 वाजेच्या दरम्यान अक्कलकुवा येथील बी.एस.एन.एल. कार्यालयातील इंजिन रुम मध्ये ठेवलेले सुमारे २० हजार रुपये किंमतीचे किर्लोस्कर कंपनीचे 30 KVA चे अलटरनेटर अज्ञात चोरट्याने इंजिन रुमचा दरवाजा तोडुन चोरुन नेले याबाबत बीएसएनएल् चे कनिष्ठ दुर संचार अधिकारी विकास कुमार दुर्गालाल महावर यांनी दिलेल्या फिर्यादीवरून अज्ञात चोरट्या विरुद्ध अक्कलकुवा पोलीस ठाण्यात भादवी कलम 380, 457 प्रमाणे गुन्ह्याची नोंद करण्यात आली असून पुढील तपास पोलीस हेडकॉन्स्टेबल गोविंद जाधव करीत आहेत.
