तळोदा l प्रतिनिधी
आदिवासी जिल्ह्यात माध्यमिक व उच्च माध्यमिक शाळेतील शिक्षक व शिक्षकेतर कर्मचाऱ्यांना एकस्तर वेतनश्रेणी पूर्ववत सुरू होण्याबाबतचे निवेदन शिक्षकेतर कर्मचारी संघटनेचे नाशिक विभागीय कार्यवाह डी. पी. महाले यांनी शिक्षण राज्यमंत्री बच्चूभाऊ कडू यांना दिले आहे.
निवेदनात म्हटले आहे की, नंदुरबार या आदिवासी जिल्ह्यातील माध्यमिक व उच्च माध्यमिक शिक्षक – शिक्षकेतर कर्मचाऱ्यांना एकस्तर वेतनश्रेणी सहाव्या वेतन आयोगामध्ये मिळत होती. शासनाने १ जानेवारी २०१६ पासून सातवा वेतन लागू केला आहे, मात्र मार्च २०१९ पासून त्याची कार्यवाही झाली, तेव्हापासून या आदिवासी जिल्ह्यातील शिक्षक – शिक्षकेतर कर्मचाऱ्यांना एकस्तर वेतनश्रेणी शासनाने बंद केलेली आहे. ही वेतनश्रेणी शासनाने सातवा वेतन आयोगाप्रमाणे इतर विभागाप्रमाणे उदाहरणार्थ जिल्हा परिषद कर्मचारी, वनविभाग, आदिवासी विकास विभाग कर्मचाऱ्यांना सातवा वेतन आयोगाप्रमाणे एकस्तर वेतनश्रेणी लागू झालेली आहे. या धोरणानुसार नंदुरबार जिल्ह्यातील माध्यमिक व उच्च माध्यमिक शाळेतील शिक्षक – शिक्षकेतर कर्मचाऱ्यांना एकस्तर वेतनश्रेणी लागू व्हावी असे म्हटले आहे.
शिक्षण राज्यमंत्री बच्चुभाऊ कडू यांचे ओएसडी विजय बोरसे नंदुरबार जिल्ह्याच्या प्रशासकीय दौऱ्यावर आले असताना त्यांच्याशी याविषयी सविस्तर चर्चा करून त्यांना सदर निवेदन देण्यात आले. यावेळी श्री. बोरसे यांनी लवकरच सदर विषयाबाबत राज्यमंत्री बच्चूभाऊ कडू यांना सविस्तर माहिती देऊन सदर विषय मार्गी लावण्याचे आश्वासन दिले. यावेळी नंदुरबार जिल्हा मुख्याध्यापक संघाचे अध्यक्ष मुकेश पाटील, नंदुरबार जिल्हा शिक्षकेतर संघटनेचे जिल्हाध्यक्ष डी. पी. महाले, जिल्हा कार्यवाह इसरार सय्यद, कोषाध्यक्ष जयेश वाणी व इतर पदाधिकारी उपस्थित होते.
