नंदुरबार l प्रतिनिधी
आदिवासी विकास विभागाने विशेष केंद्रीय अर्थसहाय्य योजनेतंर्गत शेळी गट, दुधाळ जनावराचे वाटप, पोल्ट्री फॉर्म तसेच विविध योजनेचा लाभ देण्यात यावा असे प्रतिपादन खा. डॉ.हिना गावीत यांनी केले.
खासदार डॉ.हिना गावीत यांच्या अध्यक्षतेखाली दूरदृश्य प्रणालीद्वारे जिल्हा विकास समन्वय व संनियंत्रण समितीची (दिशा ) आढावा बैठक आयोजित करण्यात आली होती. बैठकीत केंद्र पुरस्कृत विविध योजनांचा आढावा घेण्यात आला. बैठकीस आमदार डॉ.विजयकुमार गावीत, जिल्हाधिकारी मनीषा खत्री ,सहायक जिल्हाधिकारी डॉ.मैनक घोष, मीनल करनवाल आदी उपस्थित होते.यावेळी खासदार डॉ. गावित म्हणाल्या, कोविड काळात मृत्यू झालेल्यांना कुटूंबातील व्यक्तींना राष्ट्रीय कुटूंब अर्थसहाय्य योजनेतर्गत विविध योजनेचा लाभ देण्यात यावा. तसेच या योजनेअंतर्गत पात्र व्यक्तींना लाभ देण्यासाठी प्रत्येक गाव निहाय सर्व्हे करावा. जेणे करुन जास्तीत जास्त व्यक्तींना योजनेचा लाभ देता येईल. केंद्रीय विद्यालयासाठी जागा उपलब्ध बाबत पाठपुरावा करण्यात यावा. आदिवासी विकास विभागाने विशेष केंद्रीय अर्थसहाय्य योजनेतंर्गत शेळी गट, दुधाळ जनावराचे वाटप, पोल्ट्री फॉर्म तसेच विविध योजनेचा लाभ देण्यात यावा. तसेच या योजनेतंर्गत मजूर झालेला निधी त्वरीत खर्च करावा. सरदार सरोवर पुर्नवसनग्रस्तांना जमीन उपलब्ध करुन द्यावीत. दुर्गम भागातील बीएसएनएल टॉवरच्या ठिकाणी जनरेटरची व्यवस्था करावी.केंद्रीय पुरस्कृत योजनेचा लाभ देण्यासाठी सर्व विभागाने प्रयत्न करावे अशा सूचना त्यांनी दिल्यात. बैठकीत वनबंधू कल्याण योजना , एकलव्य रेसिडेन्शीयल स्कुल, राष्ट्रीय वृध्दापकाळ निवृत्ती योजना, अन्नपुर्णा योजना, खावटी अनुदान, शबरी विकास महामंडळ, सरदार सरोवर पुर्नवसन, वनपट्टे धारकांना जमीन वाटप, जिल्हा कौशल्य विभाग, कामगार विभाग, रेल्वे, पोस्ट या विभागामार्फत राबविण्यात योजनांचा आढावा घेण्यात आला. बैठकीत विविध विषयावर सविस्तर चर्चा करण्यात आली. बैठकीस समितीचे अशासकीय सदस्य डॉ.कांतीलाल टाटीया, डॉ.स्वप्नील बैसाणे, हरी पाटील, बबीता नाईक आणि विविध विभागांचे वरिष्ठ अधिकारी उपस्थित होते.
