नंदुरबार l प्रतिनिधी
जिल्ह्यातील लघु उद्योग घटकांना प्रोत्साहन देण्यासाठी उद्योग संचालनालय मुंबई यांचेमार्फत जिल्हा पातळीवर पुरस्कार योजना राबविण्यात येते. जिल्ह्यातील उत्कृष्ट लघुउद्योग घटकांना प्रथम पुरस्कार रुपये 15 हजार रोख व गौरवचिन्ह आणि द्वितीय पुरस्कार रुपये 10 हजार रोख व गौरवचिन्ह असे दोन पुरस्कार देण्यात येतात. उद्योग संचालनालयाकडे मागील तीन वर्षापूर्वीच्या कालावधीमध्ये लघु उद्योग घटक म्हणून नोंदणीकृत झालेला व कमीत कमी दोन वर्ष सलग उत्पादन करीत असणारा,बँकेचा थकबाकी नसलेला लघु उद्योग घटक या योजनेत भाग होऊ शकतो.
सन 2021 च्या पुरस्काराकरीता उद्योग घटक 1 जानेवारी 2017 पुर्वी स्थाई नोंदणीकृत अथवा ईएम भाग-2 घेतलेला असला पाहिजे. पुरस्काराच्या निवडीसाठी शासनाने ठरवून दिलेल्या निकषांच्या आधारे पात्र उद्योग घटकास प्रथम व द्वितीय पुरस्कार देण्यात येईल.
अर्जाच्या नमुन्यासाठी व पुरस्काराच्या सविस्तर माहितीसाठी जिल्हा उद्योग केंद्र, नंदुरबार या कार्यालयात कार्यालयीन वेळेत व्यक्तीश: अथवा ईमेल didic.nandurbar@maharashtra.gov.in वर संपर्क साधावा. परिपुर्ण भरलेले अर्ज महाव्यवस्थापक,जिल्हा उद्योग केंद्र जिल्हाधिकारी कार्यालय, नंदुरबार येथे सादर करावे, असे आवाहन महाव्यवस्थापक जिल्हा उद्योग केंद्र यांनी एका प्रसिध्दीपत्रकान्वये केले आहे.
