अक्कलकुवा ते मोलगी रस्त्यावर वाहन उलटल्याने सात जण जखमी

नंदुरबार l प्रतिनिधी
अक्कलकुवा ते मोलगी रस्त्यावरील ठाण्याविहिर फाट्याजवळ प्रवासी वाहन उलटल्याने सात जण जखमी झाले. याप्रकरणी चालकाविरूद्ध अक्कलकुवा पोलिस ठाण्यात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, अक्कलकुवा तालुक्यातील देवमोगरा पुनर्वसन येथील उदेसिंग रमन्या वळवी हा त्याच्या ताब्यातील प्रवासी वाहनाने अक्कलकुवा ते मोलगी रस्त्याने जात होता. यावेळी रस्त्याच्या परिस्थितीकडे दुर्लक्ष करुन ठाण्याविहिर फाट्याजवळ भरधाव वेगात वाहन चालविल्याने रस्त्यावर वाहन उलटल्याने अपघात घडला. घडलेल्या अपघातात वाहनातील समनसिंग आरशी पाडवी, लालसिंग आरशी पाडवी, अजय बोज्या पाडवी, शकीला कागड्या पाडवी, प्रमिला आरशी पाडवी, अविनाश आरशी पाडवी व रिना भामट्या पाडवी सर्व रा.देवमोगरा पुनर्वसन ता.अक्कलकुवा यांना दुखापत झाली. अपघातानंतर वाहन चालक घटनास्थळावरुन पसार झाला. याबाबत समनसिंग पाडवी यांच्या फिर्यादीवरुन अक्कलकुवा पोलिस ठाण्यात उदेसिंग वळवी याच्याविरूद्ध भादंवि कलम २७९, ३३७, ४२७ सह मोटार वाहन कायदा कलम १८४, १३४/१७७ प्रमाणे गुन्हा दाखल करण्यात आला आहे. पुढील तपास पोना.अतुल गावित करीत आहेत.