नंदुरबार | प्रतिनिधी
अक्कलकुवा शहर व तालुक्यात वीज वितरण कंपनीच्या भरारी पथकाने पाच ठिकाणी धाडी टाकून सुमारे साडेतीन लाख रुपयांची वीज चोरी उघडकीस आणली आहे.
याबाबत पोलिस सूत्रांनी दिलेल्या माहितीनूसार, नंदुरबार येथील महावितरणचे बकुळ रामदास मानवटकर यांच्यासह पथकाने अक्कलकुवा शहरात व तालुक्यात पाच ठिकाणी धाडी टाकून वीज चोरी उघडकीस आणली. यात अक्कलकुवा शहरातील कुशल नगरातील मनोज राणूलाल दागा यांनी २७ हजार ५९० रुपये किंमतीची १ हजार ७८३ युनिटची वीज चोरी, अक्कलकुवा येथील मनोज हस्तीमल जैन यांनी १४ हजार ५० रुपये किंमतीची ४४९ युनिटची वीज चोरी, महावीर मदनचंद जैन यांनी ८३ हजार ३३० रुपयांची ३०६७ रुपयांची वीज चोरी, रमेश परमसुख तवर यांनी ६९ हजार ६०० रुपये किंमतीची ३ हजार ९४२ युनिटची वीज चोरी केल्याचे आढळून आले. तसेच अक्कलकुवा तालुक्यातील वाण्याविहिर येथील दिलीप बैजनाथ यांनी १ लाख ५१ हजार ५३० रुपये किंमतीची ७ हजार ५६२ युनिटची चोरी केल्याचे आढळून आले. वीज वितरणच्या पथकाने पाच ठिकाणी धाडी टाकून एकूण ३ लाख ४६ हजार १०० रुपयांची वीज चोरी उघडकीस आणली आहे. याबाबत बकुळ रामदास मानवटकर यांच्या फिर्यादीवरुन अक्कलकुवा पोलिस ठाण्यात महाराष्ट्र वीज अधिनियम २००३ चे कलम १३५ प्रमाणे पाच वेगवेगळे गुन्हे दाखल करण्यात आले आहेत.
