नंदुरबार येथे मराठी रंगभूमी दिनानिमित्त नटराज व रंगमंच पूजन

नंदुरबार l प्रतिनिधी
नंदुरबार येथे मराठी रंगभूमी दिनानिमित्त शहरातील श्री छत्रपती शिवाजी महाराज नाट्य मंदिरात नटराज व रंगमंच पूजन करण्यात आले.
दि. 5 नोव्हेंबर हा दिवस मराठी रंगभूमी दिवस म्हणून साजरा करण्यात येतो. या दिवसाचे औचित्य साधून नंदुरबार शहरातील जिभाऊ करंडक आयोजन समिती तर्फे शहरातील श्री.छत्रपती शिवाजी महाराज नाट्य मंदिर येथे एकत्र येऊन तेथील रंगमंच पूजन व नटराज पूजनाचा कार्यक्रम आयोजित करण्यात आला होता. यावेळी नटराज पूजन दिग्दर्शक प्रमोद नाईक व अभिनेते रणजित राजपूत यांच्या हस्ते करण्यात आले. तर रंगमंच पूजन अहिराणी साहित्यिक विजय पाटील व मराठा सेवा संघाचे हंसराज पाटील यांच्या हस्ते करण्यात आले. यावेळी नाट्यकर्मी नागसेन पेंढारकर व तुषार ठाकरे यांनी जिभाऊ करंडक आयोजन समिती तर्फे दर महिन्याच्या पहिल्या रविवारी विविध नाट्य प्रकार सादर करण्याचा उपक्रम घेण्याचा मानस व्यक्त केला असून त्या उपक्रमासाठीचे ठिकाण लवकरच जाहीर करण्यात येईल असे सांगितले. या प्रसंगी मराठा सेवा संघाचे राजेंद्र पाटील म्हणाले की नंदुरबार च्या नाट्यचळवळीसाठी मराठा सेवा संघातर्फे सर्वतोपरी सहकार्य करण्यात येईल. तसेच संतोष पाटील, दिग्दर्शक प्रमोद नाईक, अभिनेते रणजित राजपूत यांनी देखील आपले मनोगत यावेळी व्यक्त केले. त्याचप्रमाणे, कोरोनाची पार्श्वभूमी बघता नाट्यगृह तसेच सिनेमागृह बंद होते. मात्र राज्य सरकारने नाट्यगृह व सिनेमागृह पूर्णपणे उघडण्याचा व विविध व्यावसायिक नाटक, एकांकिका स्पर्धा यांना परवानगी देण्याचा निर्णय अत्यंत स्वागतार्ह आहे असे प्रतिपादन यावेळी जिभाऊ करंडक राज्यस्तरीय एकांकिका स्पर्धेचे आयोजक तथा नाट्यकर्मी नागसेन पेंढारकर यांनी केले. सदर कार्यक्रमात नाट्यकर्मी मनोज सोनार, तुषार ठाकरे, मराठा सेवा संघाचे जिल्ह्याध्यक्ष रमेश पाटील, नाट्यकर्मी राजेश जाधव, आशिष खैरनार, किरण दाभाडे, एन.टी.पाटील, सागर कदम, मराठा सेवा संघाचे जिल्हासरचिटणीस सतीश पाटील, मधुकर पाटील, मनोज पवार, आनंदराव करनकाळ, नितीन पाटील, रविशंकर सामुद्रे आदी उपस्थित होते.