नंदुरबार l प्रतिनिधी
वस्त्रोद्योग धोरणाअंतर्गत वीज अनुदान योजनेचा लाभ घेत असलेले 27 अश्वशक्तीपेक्षा कमी जोडभार असलेले यंत्रमाग सोडून अन्य नोंदणीकृत वस्त्रोद्योग प्रकल्पांनी वीज सवलतीचा लाभ घेण्यासाठी 3 नोव्हेंबर 2021 पर्यत प्रस्ताव सादर करावे. असे आवाहन वस्त्रोद्योग आयुक्त श्रीमती शीतल तेली-उगले यांनी केले आहे.
वस्त्रोद्योग प्रकल्पांनी वीज सवलत सुरु असलेल्या, बंद असलेल्या तसेच नवीन वीज अनुदान सवलतीचा प्रस्ताव आयुक्त (वस्त्रेाद्योग) यांच्या संकेतस्थळावर सादर करावा. प्रस्तावासोबत मागील 6 महिन्याचे वीज देयक, प्रकल्पाचा एकूण वीज वापर जसे औद्योगिक, कामगार, वसाहतचे कार्यालय व अन्य वापर, वीज मिटरची माहिती सादर करावी. विहीत मुदतीत ज्या प्रकल्पांचे प्रस्ताव प्राप्त होणार नाहीत त्यांची वीज सवलत बंद करण्यात येईल. वीज सवलतीचा प्रस्ताव प्राप्त झाल्यानंतर प्रस्तावांची तपासणी करण्यात येईल. त्यानंतर शासनाच्या मान्यतेने सदर प्रकल्पांना वीज सवलत लागू करण्यात येईल.
वीज सवलतींच्या प्रस्तावात सादर केलेली माहिती तसेच प्रकल्पात प्रत्यक्षात असलेल्या माहितीची विभागाच्या दक्षता व नियंत्रण पथकाकडून नियमित तपासणी करण्यात येईल. तपासणीत सादर केलेल्या माहितीमध्ये तफावत असल्यास वीज सवलत तसेच अन्य सवलती तात्काळ बंद करण्यात येतील तसेच यापूर्वी दिलेल्या सर्व अनुदानाची व्याजासह वसूली करण्यात येईल.
ज्या प्रकल्पांनी 22 ऑक्टोंबर 2021 च्या शासन निर्णयातील परिशिष्टाप्रमाणे यापूर्वी माहिती सादर केलेली आहे. ती माहिती वगळून उर्वरित माहिती सादर करावी. तसेच स्वघोषणापत्र न सादर केल्यामुळे वीज सवलत बंद आहे त्यांनी देखील प्रस्ताव सादर करावे, असे प्रादेशिक उप आयुक्त, वस्त्रोद्योग, मुंबई यांनी एका शासकीय प्रसिध्दी पत्रकान्वये कळविले आहे.
