नंदुरबार l प्रतिनिधी-
पथराई ता. नंदुरबार येथील के. डी. गावित सैनिकी विद्यालय व कनिष्ठ विज्ञान महाविद्यालय, पथराई येथे मा. प्राचार्य शरद पाटील यांच्या मार्गदर्शनाखाली ‘सायबर सुरक्षेबाबत जागरूकता’कार्यक्रम उत्साहात घेण्यात आला.
यावेळी सहाय्यक पोलीस निरीक्षक नरेंद्र बैसाणे यांनी विद्यार्थ्यांना सायबर गुन्हे, ऑनलाइन फसवणूक आणि मोबाईलच्या माध्यमातून होणाऱ्या विविध फसवणुकीच्या प्रकारांबाबत मार्गदर्शन केले. सायबर गुन्हेगारांकडून मोबाईलवर आकर्षक किंवा फसवे संदेश, संशयास्पद लिंक, बनावट कॉल तसेच विविध आमिषांद्वारे नागरिकांची फसवणूक केली जाते. अशा लिंकवर क्लिक केल्यास मोबाईलमधील महत्त्वाची माहिती व वैयक्तिक डेटा चोरीला जाण्याची शक्यता असते. त्यामुळे विद्यार्थ्यांनी अशा संदेशांपासून व संशयास्पद लिंकपासून सावध राहावे, असे आवाहन त्यांनी केले.
इंटरनेटचा वापर करताना आवश्यक ती खबरदारी घ्यावी, असा महत्त्वपूर्ण संदेश देण्यात आला.
यावेळी विद्यार्थ्यांनी सायबर सुरक्षिततेची प्रतिज्ञा घेतली.
कार्यक्रमास पोलीस हवालदार सुपडू राठोड, पोलीस नाईक नरेंद्र पावरा, शिक्षण निदेशक प्रविण मोरे, अधीक्षक अजय पावरा, शिपाई अरुण पवार तसेच विद्यालयातील शिक्षक, कर्मचारी व विद्यार्थी उपस्थित होते.
