नंदूरबार l प्रतिनिधी
कोपर्ली ता. नंदुरबार येथील विधायक समिती संचलित एस.आर.सी. इंदाणी हायस्कूल व कनिष्ठ महाविद्यालयात गुरुपौर्णिमा उत्सव मोठ्या उत्साहात व भक्तिमय वातावरणात साजरा करण्यात आला.
कार्यक्रमाच्या अध्यक्षस्थानी प्राचार्य व्ही.के.पाटील होते. यावेळी ज्येष्ठ शिक्षक सी.व्ही.बरडे व एस.पी.पटेल यांची प्रमुख उपस्थिती लाभली.
कार्यक्रमाच्या प्रारंभी गुरुंच्या प्रतिमेचे पूजन व दीपप्रज्वलन करण्यात आले. त्यानंतर विद्यार्थ्यांनी गुरूंच्या कार्याचा गौरव करणारी भाषणे, विचार व मनोगते सादर केली. तब्बल २० विद्यार्थ्यांनी गुरुंच्या जीवनातील महत्त्व अधोरेखित करत कृतज्ञतेची भावना व्यक्त केली.
यावेळी संगीता राजपूत तसेच प्राचार्य व्ही.के.पाटील यांनी मनोगत व्यक्त करत भारतीय संस्कृतीतील गुरु-शिष्य परंपरेचे महत्त्व विशद केले. विद्यार्थ्यांनी गुरुंचा आदर राखत शिस्त, संस्कार आणि ज्ञानाची कास धरावी, असा प्रेरणादायी संदेश त्यांनी दिला.
कार्यक्रमात अनिता चौधरी व भूषण सोनार यांनी गुरुंच्या महिमेवर आधारित कविता व गीत सादर करून उपस्थितांची मने जिंकली.
कार्यक्रमाचे सूत्रसंचालन भूषण सोनार यांनी केले, तर आभार प्रदर्शन प्रकाश पाटील यांनी मानले.
गुरुपौर्णिमेचा हा कार्यक्रम प्रेरणादायी, संस्कारमय व उत्साहपूर्ण वातावरणात संपन्न झाला. कार्यक्रमाच्या यशस्वी आयोजनासाठी शाळेतील सर्व शिक्षक, शिक्षिका, शिक्षकेतर कर्मचारी तसेच विद्यार्थ्यांनी परिश्रम घेतले.
