नंदुरबार l प्रतिनिधी-
विसरवाडी परिसरात घडलेल्या घरफोडीच्या गुन्ह्याचा अवघ्या २४ तासांत उलगडा करण्यात स्थानिक गुन्हे शाखेला यश आले आहे. या कारवाईत आरोपीकडून सुमारे ६२ हजार रुपयांचा मुद्देमाल जप्त करण्यात आला आहे.
दि. २४ एप्रिल २०२६ रोजी विसरवाडी पोलीस ठाणे हद्दीतील फिर्यादी सरनाबाई गावीत (रा. खडकी, ता. नवापूर) यांच्या घरातून अज्ञात चोरट्याने संमतीशिवाय कपाटातील सोन्याचे दागिने व रोख रक्कम लंपास केल्याची घटना घडली होती. याप्रकरणी भा.दं.सं. कलम ३०५(अ), ३३१(१) प्रमाणे गुन्हा दाखल करण्यात आला होता.
दरम्यान, स्थानिक गुन्हे शाखेचे पोलीस निरीक्षक हेमंत पाटील यांना मिळालेल्या गुप्त माहितीच्या आधारे आरोपी विसरवाडी येथील नागपूर–सूरत राष्ट्रीय महामार्गावरील पुलाखाली थांबलेला असल्याची खात्रीशीर माहिती मिळाली. त्यानुसार पथकाने तात्काळ सापळा रचून संशयितास ताब्यात घेतले.
चौकशीत संशयितांनी आपले नाव अमित भामट्या गावीत (वय २०, रा. खडकीपाडा, ता. नवापूर) असे सांगितले. त्याच्याकडे सखोल चौकशी केली असता त्याने घरफोडीची कबुली दिली. त्याच्याकडून एकूण ५३ हजार ५०० रुपये किमतीचे सोन्याचे दागिने व ८ हजार ५०० रुपये रोख रक्कम असा एकूण ६२ हजार रुपयांचा मुद्देमाल हस्तगत करण्यात आला.
ही कारवाई जिल्हा पोलीस अधीक्षक श्रवण दत्त. एस यांच्या मार्गदर्शनाखाली, अपर पोलीस अधीक्षक आशिष कांवळे यांच्या सूचनेनुसार करण्यात आली. स्थानिक गुन्हे शाखेचे पोलीस निरीक्षक हेमंत पाटील, सहाय्यक पोलीस निरीक्षक राकेश वसावे तसेच पथकातील कर्मचारी यांनी ही कामगिरी पार पाडली. दरम्यान, या प्रकरणाचा पुढील तपास विसरवाडी पोलीस ठाण्याचे नवनियुक्त प्रभारी अधिकारी जयेश खलाणे करीत आहेत.
