नंदुरबार l प्रतिनिधी-
भगवान महावीर यांच्या २६२५ व्या जन्मकल्याणक दिनानिमित्त श्री.जैन श्वेतांबर मूर्तीपूजक संघ, नंदुरबार यांच्या वतीने शहरात विविध धार्मिक कार्यक्रमांचे आयोजन करण्यात आले. यानिमित्त अजितनाथ जैन मंदिर येथून भव्य रथयात्रा काढण्यात आली. ही रथयात्रा शहरातून मार्गक्रमण करत महावीर जिनालय येथे संपन्न झाली.
रथयात्रेत जैन समाजाचे अध्यक्ष, सचिव तसेच मोठ्या संख्येने समाजबांधव सहभागी झाले होते. आमदार चंद्रकांत रघुवंशी, उपनगराध्यक्ष प्रथमेश चौधरी, बांधकाम समिती सभापती देवेंद्र जैन, नगरसेवक राऊ मोरे, चारुदत्त कळवणकर, विलास रघुवंशी, मनीष बाफना आदी मान्यवरांची उपस्थिती होती.
शोभायात्रा संपल्यानंतर प्रवचन कार्यक्रमाचे आयोजन करण्यात आले. साध्वीजींनी भगवान महावीर यांच्या जीवनकार्यावर प्रकाश टाकत उपस्थितांना मार्गदर्शन केले. तळोदा रस्त्यावरील भगवान महावीर स्वामी मंदिरात दर्शनासाठी भाविकांनी मोठी गर्दी केली होती.
महावीर सेना यांच्या माध्यमातून तूप बाजार येथे अन्नदान कार्यक्रम पार पडला. यावेळी अध्यक्ष सतीश जैन, मदनलाल जैन, नरेंद्र जैन, आकाश जैन, विवेक जैन, कमलेश जैन यांच्यासह समाजबांधव मोठ्या संख्येने उपस्थित होते.
दरम्यान, दिवसभर आराधना भवन येथे विविध धार्मिक कार्यक्रमांचे आयोजन करण्यात आले. यात सत्संग, भगवान महावीरांची यशोगाथा, सामूहिक आयंबील तप, सामूहिक जप, संध्या भक्ती व आरती आदी कार्यक्रमांचा समावेश होता.
याच प्रसंगी तळोदा रस्त्यावरील जैन मंदिराशेजारी “भगवान महावीर मार्ग” या फलकाचे अनावरण आमदार चंद्रकांत रघुवंशी व साध्वीजी यांच्या हस्ते करण्यात आले. या वेळी बांधकाम समिती सभापती, नगरसेवक, मदनलाल जैन, मनीष बाफना यांच्यासह समाजबांधव मोठ्या संख्येने उपस्थित होते. संबंधित रस्त्याला पालिकेमार्फत यापूर्वीच नाव देण्यात आले होते; नव्याने तयार करण्यात आलेल्या फलकाचे अनावरण मान्यवरांच्या हस्ते करण्यात आले.
