नंदुरबार l प्रतिनिधी-
नंदुरबार येथील कृषी महाविद्यालय नंदुरबारचे माजी विद्यार्थी डॉ. ज्ञानेश्वर अंबादास राऊत यांची नेदरलँड्समधील नामांकित वॅगेनिंगेन विद्यापीठ व संशोधन संस्था येथे पोस्टडॉक्टोरल अभ्यासासाठी निवड झाली आहे. ते आगामी सत्रापासून वनस्पती शरीरक्रिया प्रयोगशाळेत संशोधनकार्य करणार आहेत.
डॉ. राऊत यांनी सन २०१३ ते २०१७ या कालावधीत कृषी महाविद्यालय नंदुरबार येथून प्रथम श्रेणीत बी.एससी. (कृषी) पदवी प्राप्त केली. त्यानंतर सन २०१७ ते २०१९ या काळात कृषी महाविद्यालय नागपूर येथून प्रथम श्रेणीत एम.एससी. (कृषी) वनस्पतीशास्त्र या पदव्युत्तर अभ्यासक्रमाची पूर्तता केली. पुढे सन २०१९ ते २०२४ या कालावधीत महात्मा फुले कृषी विद्यापीठ, राहुरी येथून त्यांनी आचार्य पदवी प्रथम श्रेणीत संपादन केली.
त्यांना या शैक्षणिक प्रवासात डॉ. शरद गडाख तसेच कुलगुरू पी. डी. के. व्ही. अकोला यांचे मार्गदर्शन लाभले.
डॉ. राऊत यांच्या या उल्लेखनीय यशामुळे कृषी महाविद्यालय नंदुरबारच्या शैक्षणिक प्रतिष्ठेत भर पडली आहे. महाविद्यालयाचे सहयोगी अधिष्ठाता डॉ. यू. बी. होले, विद्यार्थी कल्याण अधिकारी डॉ. दिनेश सूर्यवंशी, प्राध्यापक व कर्मचारी वर्ग तसेच आजी-माजी विद्यार्थ्यांनी त्यांचे अभिनंदन केले आहे.
