नंदुरबार l प्रतिनिधी
नंदुरबार तालुक्यातील आष्टी येथे एकाच्या कपाटातून चाबी बनवणाऱ्या इसमाने सोन्याचे दागिने लंपास केल्याची घटना घडली होती. याप्रकरणी सराईत गुन्हेगाराला स्थानिक गुन्हे शाखेच्या पथकाने ताब्यात घेतले असून त्यांच्याकडून एक लाख पाच हजार रुपये किमतीचे सोन्याचे दागिने हस्तगत केले आहेत.
नंदुरबार तालुका पोलीस ठाणे हद्दितील फिर्यादी भास्कर श्रावण आंधळे, रा. आष्टे, ता.जि. नंदुरबार यांचे दि.10/03/2025 रोजी त्यांच्या कपाटाची चावी बनविणा-या इसमाने कपाटातुन सोन्याचे दागिने चोरुन नेले म्हणुन तालुका पोलीस ठाणे येथे गु.र.नं. 102/2025 भा.न्या.सं. कलम 305 (अ) प्रमाणे गुन्हा दाखल करण्यात आला होता.
सदर गुन्ह्याचा स्थानिक गुन्हे शाखेमार्फत समांतर तपास सुरु असतांना दिनांक 24/04/2025 रोजी स्थानिक गुन्हे शाखेचे पोलीस निरीक्षक हेमंत पाटील यांना गुप्त बातमीदारामार्फत बातमी मिळाली की, सदरचा गुन्हा हा एकता नगर परिसरात राहणारा सराईत संशयित आरोपी सुतारसिंग शिकलीकर याने केला आहे व तो सध्या सुरत शहरात उधना येथे फिरत असुन पुढे कोठेतरी पळून जाण्याची शक्यता आहे, बाबत खात्रीशीर बातमी मिळालेवरुन पोलीस अधीक्षक श्रवण दत्त. एस यांच्या मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील यांनी स्थानिक गुन्हे शाखेचे पथकाला कारवाई करणेकामी सुचना केल्या.
स्थानिक गुन्हे शाखेचे पथकाकडून सुतारसिंग शिकलीकर याचा सुरत शहरातील उधना येथील प्रभु नगर परिसरात शोध घेत असतांना तो पथकास मिळून आला. त्यास ताब्यात घेऊन त्याचे नाव गाव विचारता त्याने त्याचे नाव सुतारसिंग जलसिंग शिकलीकर, वय 32 वर्षे, रा. एकता नगर, नंदुरबार असे सांगितले. त्यास विश्वासात घेऊन नमुद गुन्हयाबाबत विचारपूस करता त्याने सदरचा केला असल्याची कबुली दिली आहे.
त्याअन्वये वर नमुद आरोपीकडुन एकुण 1 लाख 5 हजार रुपये किमतीचे सोन्याचे दागिने असा मुद्देमाल हस्तगत करण्यात आला असुन तालुका पोलीस ठाणे गुरनं. 102/2025 हा उघडकीस आणण्यात स्थानिक गुन्हे शाखेला यश मिळाले आहे. सदर ताब्यातील आरोपीला तालुका पोलीस ठाण्याचे ताब्यात देण्यात आले असुन गुन्हयाचा पुढील अधिक तपास सुरू आहे.
सदरची कामगिरी पोलीस अधीक्षक श्रवण दत्त. एस, अपर पोलीस अधीक्षक आशित कांबळे, यांचे मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, पोलीस उपनिरीक्षक मुकेश पवार, तसेच पोहेकॉ मुकेश तावडे, बापु बागुल, विशाल नागरे, पोशि अभय राजपुत, शोएब शेख, रामेश्वर चव्हाण अशांनी केली आहे.
