नंदुरबार l प्रतिनिधी
तालुक्यातील आष्टे गावात वराहांचे मृत्यू आफ्रिकन स्वाईन फिवरनेच झालेत; यावर भोपाळ येथील नॅशनल इन्स्टिट्यूट ऑफ हाय सिक्युरिटी ॲनिमल डिसीज म्हणजे प्राणी रोग अन्वेषण प्रयोग शाळेने शिक्कामोर्तब केले आहे. हा रोग जलद गतीने पसरणारा असल्यामुळे आपल्या जीवाची आणि इतरांची सुरक्षा म्हणून कोणीही वराहाचे म्हणजे डुकरांचे मांस खाऊ नये तसेच योग्य अंतर राखून सार्वजनिक आरोग्य राखावे; असे आवाहन नंदुरबार जिल्हा परिषदेच्या अध्यक्ष डॉक्टर सुप्रिया गावित यांनी केले आहे.
जारी केलेल्या पत्रकात त्यांनी म्हटले आहे की, नंदुरबार जिल्हाधिकारी डॉक्टर मिताली सेठी यांनी याविषयी जारी केलेल्या माहितीत म्हटले आहे की, तालुक्यातील आष्टे गावात वराहांचे मृत्यू आफ्रिकन स्वाईन फिवरनेच झालेत; यावर भोपाळ येथील नॅशनल इन्स्टिट्यूट ऑफ हाय सिक्युरिटी ॲनिमल डिसीज म्हणजे प्राणी रोग अन्वेषण प्रयोग शाळेने शिक्कामोर्तब केले आहे. सदर रोग जलदगतीने पसरणारा अधिसुचित रोग असल्याचे दिसून आलेले आहे.
जिल्हयामध्ये आफ्रिकन स्वाईन या रोगाचा प्रतिबंध व नियंत्रण करण्यासाठी संबंधीत विभागांना उपयायोजना करण्याची सूचना करताना स्पष्ट सांगितले आहे की बाधित क्षेत्राच्या 1 किमी परिसरातील सर्व वराहांचे कलींग करुन त्यांची विल्हेवाट शास्त्रीय पध्दतीने लावून त्या परिसराचे निजंतुकीकरण करावे.
डॉक्टर सुप्रिया गावित यांनी पुढे म्हटले आहे की, हे सर्व लक्षात घेता शहरी आणि ग्रामीण आरोग्य सुरक्षेच्या दृष्टिकोनातून ग्रामपंचायत यंत्रणेपासून सर्वांनीच दक्षता बाळगणे अत्यावश्यक आहे. त्यात सुयोग्य जैवसुरक्षा उपाययोजना करणे, पाळीव तसेच जंगली वराहातील अनियमित मर्तुकीवर बारकाईने लक्ष ठेवणे, स्थानिक पशुवैद्यकांनी नियमितपणे भेटी देवून नियंत्रण ठेवणे, आदी उपाय आवश्यक आहेत. तथापि निरोगी वराहाचे घरगुती व कत्तलखान्यातील कच्चे मांस उपपदार्थ तसेच कचरा यांच्याशी संपर्क येवू देवू नये, असेही डॉक्टर सुप्रिया गावित यांनी म्हटले आहे.
